Maniitsumi akileraarut appassaaq
Maniitsoq Sisimiullu kommuninngorpata ataaseq Maniitsumi innuttaasut kattunnerminnut atatillugu tunissutisiassaqarput.
Tassa kommunimut akileraarutip 26 procentimiit 25 procentimut aningaasanut 2008-mi missingersuummi appartinneqarnissaa anguniarniarlugu illoqarfiit taakku kommunalbestyrelsiisa isumaqatigiissutigisimavaat, taamaalilluni akileraartarnermut politikki Sisimiut Kommuneannut naleqqussarneqassaaq. Sisimiut Kommuneanni akileraarut maanna 25 procentiuvoq.
Sisimiut Kommuneat taama ilisimatitsivoq. Borgmesterip Hermann Berthelsenip aamma nuannaarutigaa, ukiuni kingullerni ileqqunngorsimasoq, tassa aningaasanut missingersuutit Sisimiut Kommunalbestyrelseanni ajunngivissumik isumaqatigiissutaasarnerat. Sisimiut Kommuneanni ukiuni 2007-miit 2010-p tungaanut aningaasartuutissat partiit tamarmiullutik akuersissutigereerpaat.
Kommunep aningaasartuutai ajunngilluinnarput, aningaasartuutissanullu ukiuni arlalinni pilersaarusiornerup kommunip innuttaasunut sullissinera ajorsinerutinngilluinnarpaa.
Isumaqatigiissutip aamma imaraa, Sisimiut Kommuneat tassaassasoq Kalaallit Nunaanni akileraarutikinnerpaat ilaat.
