Pinngitsaaliinermut tunngatillugu nutaanik paasissutissaqanngilaq
Københavnimi pinngitsaaliisoqarsimanerani paasinianermi suli paasisaqartoqanngilaq. Per Mejrup Station City-mi pigaartoq oqarpoq ulluni kingullerni paasiniaanermi suli ingerlaqqittoqarsimanngitsoq.
Paasiniaanermut iluaqutaasinnaasunik saaffiginnittoqarsimanngiivittoq, nassuiaavoq.
Pinngitsaaliineq politiit oqarnerattut sapaatiummat ullaassakkut pivoq. Arnaq kalaaleq 21-inik ukiulik isaariamut kaleriarlugu pinngitsaalineqarsimavoq. Pinngitsaaliisoq 20-inik ukioqarsorineqarpoq danskisullu isikkoqarluni.
Pinngitsaaliinerata nalaani kammalaatai pingasut isiginnaarsimapput.
Politiit pinngitsaaliinermut takunnissimasunik ujarlerput. Sulili saaffiginnittoqanngilaq. Taskia oqarasuaataalu angallattagaq aamma ujaarigaluarpaat sulili nassaarinngilaat.
Politiit aamma suli isaariaq pinngitsaaliiffigineqarsimasoq sumiinnersoq naluaat. Politiit pinngitsaalitinnikoq oqaluuteqqikkusukkaluarpaat, kisiannili taanna piumanngilaq. Neriuppugut kammalaataata ilaqutaatalu kajumissaarsinnaassagaat, pigaartoq Per Mejrup oqarpoq.
