Nanortallip Kommuniani piniartut marluinnarnik nannuttassinneqarnertik naammaginngilaat.
Hans Levisen Nunap Isuata eqqaani Aappilattumi piniartoq oqarpoq, nannuttassat pillugit tusarniaasoqarmat siunnersuutigisimagitsik, Upernavimmi nannuttassat 50-niit 35-nut ikilisillugit namminneq 15-inik nannuttassinneqarnissartik siunnersuutigisimallugu.
- Qanoq sikorsuaqartiginera apeqqutaalluni ukiumiit ukiumut qassinik nannuttarnerput assigiinneq ajorpoq, massakkorpiarlu sikorsuarpassuaqarpugut, Hans Levisen nassuiaavoq.
2005-mimi marlunnik nannussimapput. Ukiorli alla qulingiluanik nannuttoqarsimalluni. Sikorsuit Tunup avannaaniit takkunneri ilutigalugit nannut aamma takkuttarput.
-Ilungersunaqaaq. Puisit amiisa saniatigut allanik aningaasarsiutissaqanngilagut, Hans Levisen nangilluni oqarpoq.
Pappialat tigoriarunikkit, akisussaasunut tusaaniarneqaqqullutik saaffiginnissuteqassamaarlutik Hans Levisen oqarpoq.