Qinersinermi peqquserluttoqarsimanersoq pillugu nalunaarusiortoqarpoq

Afghanistanimi præsidentimut qinersineq oqallisaaqisoq, peqquserluttuliortoqarneranillu pasilliiffioqisoq pillugu nalunaarusiaq, qinersinermut ataatsimiititaliap, Naalagaaffinnit Peqatigiinnit tapersersorneqartup, ullumi saqqummiutissavaa.

19. oktober 2009 06:56

Afghanistanimi præsidentimik nutaamik toqqaasoqassanersoq imaluunniit Afghanistanimiut qinerseqqissanersut nalunaarusiamit aalajangiiffigineqariaannaavoq.

Nalunaarusiap sapaatip akunnerata naanerani saqqummiunneqarnissaa naatsorsuutigineqaraluarpoq, nunanili killerneersut qinerseqqittoqarnissaanik præsident Hamid Karzaimik akuersititsiniaraluarnerat pissutigalugu saqqummiunneqarnissaa kinguartinneqarsimavoq.

Karzaip, præsidentimut qinersinermi ajugaasutut siusinnerusukkut suaarutigineqareersup, qinerseqqittoqarnissaa akerleraa. Aamma taassuma qinersinermi peqquserluttoqarsimaneranik misissuineq nunanit killernit, soorlu USA-mit NATO-mullu ilaasortanit aqunneqarnerarlugu isornartorsiorpaa.

Aggustimi qinersineq præsident Karzaip aamma nunani killerni naalakkersuisut, Afghanistanimi Talibanimut sorsuttut, akornanni aaqqiagiikkunnaarnermik kinguneqarpoq.

Din mening er vigtig for os. Vi modtager gerne ris eller ros om denne artikel.