SAR-imik ujaasineq: Angut Paamiut tunuata qaqqaani tammartoq

Angutit inuusuttut marluk ippassaq Paamiuniit avannaata tungaanut nunakkut pisullutik angalaarnertik aallartissimavaat, ippassarli unnukkut angutip aappaa kisimiilluni utimut apuuppoq.

Pujornera peqqutigalugu imminnut tammarsimapput angutillu aappaa ikiortissarsiniarluni Paamiunut utersimavoq.

Kalaallit Nunaanni Politiit KNR-imut taama nalunaarput.

Tamassuma kingorna politiit SAR-imik ujaasinertik aallartippaat, unnullu ingerlanerani kajumissutsiminnik ikiuuttut ujaaseqataapput. Ullumikkut tallimanngornerup ullaavani politiit Issittumi Sakkutooqarfimmit qulimiguulimmik ujaaseqataasussamik pissarsisimapput.

Ullumikkulli nalunaaqutaq 09.25 angutip ujaarineqartup angutaa politiinut sianerpoq. Ujaarineqartup angutaa Sverigemi najugaqarpoq erneratalu angerlamut apuussimanerarnera siarngutigisimavaa.

- Inuttaa suli oqaloqatiginngilarput, kisianni uatsinnut pingaarnerpaavoq ajorani angerlamut apuussimanera, Kalaallit Nunaanni Politiini pigaartut pisortaat, Ole Hald, taama oqarpoq.

Taanna kikkunnut tamanut illoqarfik qimallugu pisullutik angalaarniartunut assigisaanilluunniit ersarissumik innersuussuteqarpoq.

- Mobilimik allamilluunniit nassarsimanngilaq, pisulluni angalaassagaanni ikiortariaqaleraannilu siarngutigineqarsinnaaniassammat tamakkuninnga nassartarnissaq maanngaanniit innersuussutigingaarparput. Una pisoq qujanartumik inerneqarluarpoq, taanna oqarpoq.

Kalaallit Nunaanni Politiit ujaasinertik unitsippaat susoqarpiarsimaneralu paasiniarlugu angut pineqartoq oqaloqatigissamaarpaat.