Akunnerni 15-ini annaassiniariartorneq: Annaassiniarnermi allatut iliortariaqartut

Sisimiut avannaata kangianit ajornartorsiornermik ataasinngornermi ullorornerani qulinngortoq kalerrisaarisoqarpoq.  

Tamatuma kinguneranik marlunngornermut unnuuata tungaanut annaassiniariartortoqarpoq.

- Annaassiniariartortoqarpoq, pujormalli taakkku apuunniarnerat sivisuvoq, Kalaallit Nunaanni Politiit pigaartuisa pisortaat Thomas Ottesen oqarpoq.

Pisullutik angalaqatigiit ilaat asimiitillutik iluaallersimavoq. 

Taassuma napparsimalluni iluaallernini nukillaangaliitigisimagaa ilisimatitsissutigineqarpoq. 

Anorlerlunilu pujortoq

Upalungaarsimasut qulimiguulimmik kalerrisaariffiusumukariartoramik apuutiaarnerunnginnerat pujorneranik peqquteqartoq, politiit pigaartuisa pisortaat oqarpoq. Taakkuali pujormammi utertariaqarmata, upalungaarsimasoqataanni qatserisartut qaqqasiortartui umiatsiarlutik annaassiniariartorlutik aallarput.

Taakku akunnialunni umiatsiaareerlutik kalerrisaariffiusup nalerpiaanut apuukkamik ujaasilerput.

- Ulloq naapajaarlugu ujaasivugut. Aatsaat unnuttoq nassaarivagut, Thomas Ottesen oqarpoq nangillunilu:

- Iluaallersimasoq ajunnginnersoq isumannaarniarlugu passutassaanersoq misissorparput. Pisariaqanngitsorli erserpoq. Isorartuumi pisullutik angalanerminni anorlerlunilu pujormat iluaallernini nukillaangaliitigisimagaa paasinarsivoq.

Tassa inuk ataasiinnanngitsoq inuilli marluk, angut arnarlu tamarmik 40-t sinnerlugit ukiullit, ikiornasuartariaqartut aamma erserpoq. 

- Taakku Sisimiunut unnuami marlunut qiteqquttoq tikiunneqarput, politiit pigaartuisa pisortaat oqarpoq.