KNR-ip pisortaa: Sermitsiaq.AG imminut ajunngitsussarsiuuppoq

Taamaaliormata KNR-ip tusagassiuuteqarfik saassuterujussuarpaa, KNR-ip isigineqarnera Sermitsiaq.ag-mit suna tamaat atorlugu ajortisarniarneqartoq oqarluni.

- Isumaqarpunga, suliaq una Sermitsiaq.ag-mi unammillertitsinnit isiginiarneqaqisoq. Aamma isumaqaqqajaasarpunga, oqallinneq sakkortuallaalaartartoq, KNR-ip pisortaa Søren Lennert Mortensen oqarpoq.

Aamma atuaruk KNR-ip najukkami radio Voice of Greenland matugallarpaa

Taanna KNR.gl-imi ilanngussaqarluni allappoq, Sermitsiaq.AG-p nammineq pilerisaarutitigut isertitani, taamaalillunilu aamma aningaasarsiornikkut soqutigisani, illersorniarlugit, nammineq tusagassiuutini atormagit eqqarsaallannartuusoq.

Søren Lennert Mortensen inuusuttunut radioqalernissaa akerlerineqarmat ugguarpoq, Sermitsiaq.AG-lli KNR-imut isornartorsiuisumik pissuseqarnera taamaattussatut isigalugu.

- Aammami taamaaliukuttoorniarlik, kisiani isumaqarpunga tusagassiortutut sulinermi imminut ajunngitsussamik qanoq suliaqartoqartigisinnaaneranut killissaqartoq. Uagutsinnut isorinnittumik pissuseqarmata paasinnilluinnarpugut. Soorunami taamaassaaq. Uagut aamma taakkununnga isorinnittumik pissuseqarsinnaarusuppagut, Søren Lennert Mortensen oqarpoq.

Aamma atuaruk Kalaallit Nunaanni tusagassiornerup/isiginnaagassaqarnerup iluani nutaamik eqqarsartalernissaq pisariaqalerpoq aammalumi atorfissaqartinneqarluni

Sermitsiaq.AG-ip pisortaa Poul Krarup oqaaseqarumanngilaq, Atuagagdliutit aaqqissuisuannut innersuussilluni, tassanngaanniimmi KNR allaaserineqaqattaarmat.

Atuagagdliutit aaqqissuisuat Christian Schultz Lorentzen aamma oqaaseqarnianngilaq, eqqaalluguli isornartorsiuineq sulianut tunngasuusimasoq, aammalu pisortanit ukiumut 75 millionit koruuninik pissarsisaraanni tamanit isiginiarneqarneq sungiunneqartariaqartoq oqarluni.