Nunatsinni assilisat allagaateqarfissuarmiittut akeqanngitsumik atorneqariaannaalertut

Allagaatitoqqat pequtitoqqallu Arktisk Instituttip Københavnimi Christianshavnimi Det Arktiske Husimiittup allagaateqarfissuaniipput. Taakku asseqanngitsuusut danskit kalaallillu kulturikkut kingornussaasa ilagaat.

Assit 300.000-nit ikinnerunngitsut, nunap assingi 5.000-t missaat allaallumi ilisimasassarsiortuusimasup Peter Freuchenip umii Arktisk Instituttip allagaateqarfissuani ilisiverujussuit ilaanni nassaassaapput.

Danmarkip ilisimatusarnermut aqutsisoqarfia Arktisk Insituttimut aningaasaleeqqammerpoq, tamannalu kikkulluunniit nunatsinni ilisimasassarsiorluni, kunngikkormiunik tikeraartoqarnermi ulluinnarnilu assilisanik Arktisk Instituttip allagaateqarfissuaniittunik akeqanngitsumik atueriaannanngornerannik kinguneqarpoq.

- Assit allaagaateqarfissuatsinniittut akeqanngitsumik atorneqariaannanngortitaanerat nuannaarutigeqaarput. Assimmi taakku kikkunnuulluunniit killeqanngingajalluinnartumik nuannaarutissiissutigeriaannaarusuppavut, Arktisk Instituttip pisortaa Anne Mette Randrup Jørgensen oqarpoq.

Tassa kikkulluunniit atuakkiamik naqiterisitsiniartut saqqummersitsiniartulluunniit assinik taakkuninnga Arktisk Instituttip nittartagaatigut akeqanngitsumik atueriaannanngorput.

- Assinik 100-nit ikinnerunngitsunik Nuuk pillugu atuakkiamik naqiterisitsinissamut atugassiisinnaatitseqqammerpugut, Anne Mette Randrup Jørgensen oqarpoq.

Niuernerpalaartumik atuiniartut Arktisk Instituttimit immikkut akuersissuteqaqqaarlutik assinik taakkuninnga atuisinnaatitaasassasut, taassuma ilanngullugu oqaatigaa.

Malunnaatilimmik ilisimasassarsiornermiit ilaqutariit pisuttuarneranni assilisat

Nunatsinni qanga nalliuttorsiornerni ulluinnarnilu assilisat Arktisk Instituttip nittartakkakkut assiisivianiittut akunnerpaalunni eqqissiivilluni qimerluugassaqqipput.

Danmark-ekspeditionimik taallugu ilisimasassarsiorluni angalanermi Knud Rasmussenillu Avanersuarmi ilisimasassarsiorluni angalanerani assilisat tusaamaneqarnerpaagunartunut ilaapput, assilli amerlanerpaartaat nunatsinni ulluinnaat qanoq ittuusimanerannik ersersitsilluinnarput.

Assimmi ilarpassui danskit ilaqutariit ukiorpaalunni nunatsinniissimasut tunniussaasimakkajupput.

Taamaammat ilaqutariit pisuttuarneranni, atualertoornermi sullivinniluunniit pisuni assilisat Arktisk Instituttip assiisiviani takussaasunut ilaapput.

Ilaqutariit Jacobikkut assiutigisimasaat Anne Mette Randrup Jørgensenip ilitsivissuarmiit tigoriarlugit assersuusiullugit takutippai.

- Jacobi Ilulissani niuertutoqaasimavoq, taassumalu ernii marluk nunatsinni arlaatigut aamma sunniuteqartuusimapput. Taakku assiutaat qiviaraanni namminneq assilisarisimagaat nalunanngilaq, assimmi taakku ilaqutaannik ikinngutaannillu danskinik kalaallinillumi ilaqarput, taanna oqarpoq.

Anne Mette Randrup Jørgensen Artisk Instituttimi ukioq manna pisortanngortigani Naalagaaffiup katersugaasivissuani Danmarkimiittumi ingammik nunatsinnut Issittumullu tunngasuni ilisimatusartuuvoq. Assi © : Mads Malik Fuglsang Holm

Assiisivik ataatsimoorluta uummarissarsinnaagipput

Arktisk Institut imminut pigisuusoq katersugaaterpassuaminik aningaasaateqarfinnit aningaasaliiffigineqarnkkut allanngutsaalillugillu tamanut atukkiisarpoq.

- Neriuppunga assit toqqortaativut inuiaqatigiinnit qimerluualaarneqarlutillu iluarisamik atorneqarluarumaartut. Atorneqarluarunimmi tamatsinnut nuannaarutaanerussapput, Anne Mette Randrup Jørgensen oqarpoq.

Assit Arktisk Instituttip allagaateqarfissuaniittut nittartakkakkut attaveqaatitiguinnaanngitsoq qimerloorneqarsinnaapput. Arktisk Instituttimi assitoqqanik pequtitoqqanillu nunatta Issittullu oqaluttuarisaanerannut attuumassutilinnik Det Arktiske Husimi Københavnimi Christianshavnimi Strandgademiittumi aamma saqqummersitsikkajuppoq.