Nivi Geisler: Ersiginerpaasara ajugaaffigisinnaagakku nuannaarpunga

Nivi Geislerip aallakaatitassiami siunertarineqartoq torragalugu peqataarusulersimavoq.

- Peqataarusullunga aalajangersimavunga DR-minngaanniit nassuiaakkaminnga suna siunertaanersoq siunertaa pinerullugu ilaarusulersimavunga.

Nivi Geisler oqarpoq nangillunilu:

- Aallakaatitap siunertarivaa arnat aamma pisinnaasut. Arnat aamma sapinngillat. Oqariartuutaa taanna torragigakku, arnat imatut tusarsaarujunnginnamik ekstremenik misilittagallit imaluunniit nuisavallaannginnamik aamma.

Arnat aamma pisinnaasut

Sakkutuut Tunup avannaarsuani nakkutilliisut, Siriuspatruljen, 1950-imiit nakkutilliilermatali arnanik suli peqataasoqarsimanngilaq. Aallakaatitassiamilu ingerlatsisup Anika Tronierip arnat aamma pisinnaanerat ersersinniarlugu nangeqattaartuliorusulersimalluni, DR-ip nangeqattaartuliaani oqaluttuarai.

Arnat 18-it piginnaasaqarluartut timersornermik aallussisuupput, nangeqattaartuliamilu taakkua eqqarsartaatsikkut timikkullu qanoq nukittutiginerat misilerarneqarpoq.

Tunup avannaarsuani Siriuseqarfimmit nakkutilliisunit aqqusaarneqartartut ilaat misilerarnerat, Nivi Geislerimut unammillernaraluartut nuannersumik misigisaqarfigai.

Peqataanerminilu qanoq pisinnaasaqartiginerluni killissanilu sumiinnersoq paaserusussimavaa.

- Peqataaninni anguniarpara takorusullugu qanoq pisinnaatiginerlunga. Killissara sumiinnersoq paasiniarlugu, taanna oqarpoq.

Ersiginerpaasani ajugaaffigigaa

Nivi Geislerip 2014-imi Ironmanimi, arpannermik, cykelernermik nalunnermillu unammissutaasumi, unammeqataavoq. Unammisut amerlaqimmata naluttussanngoramik, tingikaasut qalleraassimapput, Nivi Geislerilu qallerneqartarnini kingunerlutsillugu naluttarunnaarsimavoq.

Misileraanerminnilu immamut pissikkami ersiginerpaasani ajugaaffigaa.

-Ersiginerpaasara ajugaaffigisinnaagakku nuannaarpunga, taanna aallakaatitassiami apersorneqarami oqarpoq.

Nivi Geislerillu ersiginerpaasani ajugaaffigisutut misigigaluarlugu, DR-ip aallakaatitaani naloqqinnini iluatsinngitsoorlugu taamaatiinnartariaqalerpoq.

- Tassalu tamaanga killiinnartariaqalerputit, Anika Tronier aallakaatitassiani ingerlatsisoq oqarpoq.

Nivi Geislerip unamminermut peqataaqqissinnaajunnaarnerminut suna peqqutaanersoq ilisimaaraa.

- Immami aqqaamanissaq sanngiiffigaara. Taamaannera suliarisariaqarpara, Nivi Geisler nangeqattaartuliani oqarpoq.

Nangeqattaartuliaq piviusumik tunngavilik ”Slædepatruljen” dr.dk nittartagaani isiginnaarneqarsinnaavoq.