KNR-ip najukkami radio Voice of Greenland matugallarpaa
KNR radiokkut nuna tamakkerlugu kisiat aallakaatitsisinnaavoq, taamaattumik najukkami radio Nuummi tusarnaarneqarsinnaasoq, Voice of Greenland, KNR-ip januarimi pisiaa, FM-ikkut aallakaatitsisartoq unnuaru unnuap qeqqanut matuneqassaaq, aallakaatitsinissamut akuersissutip akuerineqarnissaata tungaanut. Voice of Greenland internettikkut suli tusarnaarneqarsinnaavoq.
- Nuna tamakkerlugu aallakaatitsisussaatitaavugut, najukkamiinnanngitsoq, taamaammat naatsorsuutigisimavarput matuneqarallassasoq, KNR-ip pisortaanera Søren Lennert Mortensen oqarpoq.
Aamma atuaruk Tusarnaartartut inuusuttuunerusut KNR-ip sullinniarpai
Maanna pisimasut eqqarsaatigalugit Nuummi radiop pisiarinnginnerani allanngueqqaarsimannginnini maanna ugguarilaarpaa.
- Qanoq iliorsimasinnaaneq oqaluuserineqarsinnaajuarpoq. Pisullu qaangiukkaangata allatut iliorsimanissaq ersarinnerulertarpoq. Oqaannarsinnaavunga iluamik ingerlavugut.
Aamma atuaruk KNR-p aallakaatittagai radioqarfimmik pisinermi pitsanngortinneqassapput
- Qanoq iliornissarput eqqarsaatigereersimavarput. Nassuerutigissavarpullu ilikkagaqarsimagatta. Maannalu pisariaqartitarput kingulleq qinnutigaarput, Søren Lennert Mortensen oqarpoq.
Namminersorlutik Oqartussat FM-ikkut DVB-T-ikkullu aallakaatitsisinnaanermut akuersissummut qinnuteqaammik pereerput.
- Qinnuteqarsimavugut, akuersissutillu assigiinngitsut pereerpavut. Maannalu kingulliullugu qinnutigaarput Voice radio siunissami DVB-T-båndimut fjernsynikkut aallakaatitanut ilanngunneqarnissaa, aammalu nuna tamakkerlugu FM-ikkut aallakaatinneqarsinnaanissaa. Taamaalilluni siunissami FM aallakaatinneqartalissaaq, pisortaaneq nassuiaavoq.