KNR Kalaallit Nunaanni tusagassiornerup/isiginnaagassaqarnerup iluani nutaamik eqqarsartalernissaq pisariaqalerpoq aammalumi atorfissaqartinneqarluni
Suleriusissat pilersaarusiorneqarnerannut atatillugu KNR-imi siuttuusut aalajangersimapput Kalaallit Nunaanniittut qaninnerusumik attaviginialerniarlugit. Tamannalu pisinnaavoq nutaamik radiokkut aallakaatitsisalernertigut. Taanna radio aqqutigalugu inuusuttut KNR-ip tunniussinnaasaanik atuinerat annertunerulerumaartoq kissaatigineqarpoq. Kalaallit Nunaanni tusagassaqartitsiviit annertunerusumik inuusuttunit atorneqalernissaat soqutigineqalernissaallu siunertaasut ilagaat.
Isumaga naapertorlugu taamatut suliniuteqarneq torrallataavoq suliniutaallunilu imaanaanngitsoq. Aammattaaq isumaga naapertorlugu suliniut kalaallit amerlanersaannit nuannarineqarpoq. Taamatut suliniuteqarnertigut KNR-ip kikkunnik tamanik sullissisussaatitaanera aammattaaq qulakkeerneqassasoq isumaqarpunga.
Inatsisit atuuttuusut iluini aammalu aningaasatigut akuersissutaasut iluini radio, tv nutaarsiassallu eqqarsaatigalugit KNR sulerusuppoq -tassalu anguniakkatta pingaarnersaat piviusunngortikkusutarpullu.
Tusagassiorfiit allat allarniinitsinnut tupaallaateqarmata paasisinnaavarput tassami nutaarluinnaavoq KNR taamak siunertaqarluartigaluni naalaartartumi kissaatigisaanik ilaliinera radiukkut sullissineq nutaarluinnaq atorlugu.
Inatsisini allassimasut eqqarsaatigalugit KNR ilaatigut piseqqusaarutit aqqutigalugit isertitanik aningaasalersorneqareerpoq
Ullumikkut sunaluunniit aningaasanik naleqarpoq, soorngunalumi aamma ineriartortitsineq aningaasanik naleqarluni. KNR ineriartortinneqassappat annertunerusumillu aallakkaatitsisinnaalissappat nutaarsiassanillu amerlanerusunik tusagassaqartitsilissappat tamakkua tamarmik aningaasanik naleqarput. Tamakkua tunulequtaralugit KNR piseqqusaarutinik ingerlatsisarpoq, tassami inatsisit atuuttuusut naapertorlugit tamanna ajornanngimmat. Uanga nammineq isumaga naapertorlugut KNR piseqqusaarutinik ingerlatsinissaminut pisussaavoq, tassami tassuuna aningaasat isertut amerlasoorsuunngikkaluartut KNR-imi ingerlatitsinermut tapertaasarmata, isertitallu ikkua pingaaruteqartutut oqaatigisariaqarput. KNR-imi ineriartortitsineq naapertorlugu aallakaatinneqartartut amerliartortinneqassappata piseqqusaarutinik ingerlatsisinnaannermut pisinnaatitaanerput atorluartariaqarparput. Ukiuni tulliuttuni pisortanit amerlanerusunik aningaasaliiffigineqarsinnaanerput ilimanaateqangitsutut oqaatigisariaqarparput.
2015-imi piseqqusaarutit aqqutigalugit ataatsimullu isigalugit koruunit 4 milliuunit isertinneqarnissaat KNR-imi naatsorsuutigaarput, matumani aamma radiokkut aallakkaatitsiffittaatta isertitassai naatsorsuutigaagut. Aningaasat eqqaaneqartut KNR-imut aningaasarpassuupput, kisiannili aningaasat Kalaallit Nunaanni piseqqusaarinermut atorneqartut ataatsimut eqqarsaatigalugit aningaasat matumani eqqaaneqartut, 4 milliuunit, amerlagisassaanngillat.
Sermitsiap AG-llu piseqqusaarutitigut isertitakkami amerlassusiat taamatullu aningaasarsiaminnut tungassuteqartut isertorniarlugillusooq tusagassaqartitsivini/nittartakkanilu aqqutigimmagit eqqarsarnartoqarpoq. Tamakkuali allatut aaqqinneqarnissaat Sermitsiaq.AG-imi siuttuusut aalajangertussaavaat.
KNR-ip radiukkut kanalia nutaaq Voice of Greenland internetimi radiutut ingerlagallassaaq
Kanalimik pisineq aningaasaqarnermut tunngatillugu isumatusaarneruvoq tassa aningaasat iserteqqinneqarnissaannut piffissaq sivisoorsuunngilaq, tamatumunnga ilanngullugu inuusuttunik marlunnik pikkorissunik pisinermut ilaasunik sulisoqalerpugut. Inuusuttut sulisortaatta inuusuttut kissaatigisaat aamma pisariaqartitaat ilisimavaat, taakkulu kanalimik nutaamik ingerlatsineq ingerlatiinnassavaat KNR-imullu akuulerneq peqataaffigalugu.
Kanalimut tunngatillugu eqqarsaataajuaannarsimavoq internetikkut kanalip ingerlanneqarnissaa, tassunga ilanngunneqartassapput aallakaatitaq DVBT båndikkoortoq nutaakkut, taanna fjernsynikkut tusaaneqarsinnaavoq. Tamatuma saniatigut kingusinnerusukkut aammattaaq FM aqqutigalugu aallakaatitsisarusuppugut, kisianni tamatumani unioqqutitsisoqassanngippat piumasaqaataavoq sineriak tamakkerlugu naalaarneqarsinnaanissaa. Taamaattumik KNR peqquneqarpoq Nuummi FM-ikkut aallakaatitsineq matussagaa, nuna tamakkerlugu FM-ikkut sakkortusaaviit pilersinneqarnissaasa tungaanut. FM-ikkut aallakaatitsiviup radiup maligaasai (frekvens) 105,0 Voice of Greenland matuneqassaaq unnuaru nal. 24.00.
DVBT-mut aallaavimmut isersinnaanermut aammattaaq FM-ikkut sakkortusaavinnut nutaanut qinnuteqaateqarneq Namminersorlutik Oqartussanut nassiunneqarpoq suliareqqitassanngorlugu.
Kanalimut nutaamut aallakaatitassanik piareersaaneq ingerlalluarneqalereerpoq kiisalu inuusuttut tamarmik qilanaarisinnaavaat pissanganartumik nutaajusumillu radiumik tusarnaarsinnaalernissaq.
Illoqarfinni assigiinngitsuni tv-qarfiit KNR-mit suli tapersersorneqarput
Kalaallit Nunaanni illoqarfinni assigiinngitsuni tv-qarfiit amerlanersaat aammalu sullissisugut allat ajunngilluinnartumik attaveqarfigaagut. Sinerissami aallakaatitassiortartut pikkorillutik suliaat uagut iluaqutigaagut. Ukiumut koruunit 3-4 milliuunit atorlugit piffinni assigiinngitsuni sulianik pisisarpugut. Tamanna eqqortuliornertut oqaatigisariaqarpoq, tassami taamaasiornitsigut sinerissami piffiit assigiinngitsut angusinnaasarpagut tamatigoortumillu sulinissarput naammassisarlugu. Aningaasat koruunit 3-4 milliuunit tamatumunnga atorneqartut aningaasarpassuartut oqaatigineqarsinnaanngillat.
Illoqarfinni assigiinngitsuni tv-liortartunik suleqateqarnerput ingerlaannassaaq. Illoqarfinni assigiinngitsuni tv-liortartut pikkorissiartornerat ilutigalugu suleqatigiinnitta annertusiartornissaa ilimanaannaavoq.
Tusagassaqartitsineq/nutaarsiassaqartitsineq/isiginnaagassaqartitsinerit eqqarsaatigalugit oqaloqatigiinnissamut KNR piareersimavoq
Siunissami nutaarsiassanik assigissaannillu suliaqarnermi atugassarititaasut qanoq ittuunissaat politikerinit aalajangerneqartussaavoq. Tamakkuninnga suliaqartut ataasimoorlutik nukitik atussagaat siunnersuutigaara innersuussutigalugulu, tassami taamaaliornitsigut kinguneqarluarsinnaasumik immitsinnut attaveqatigiilissagaluaratta. Eqqartorneqarsinnaasut ilagaattaaq inatsisit pissutsillu eqqarsaatigalugit qanoq suleriaaseqarsinnaasugut. Tamakkua aaqqineqariarpata ineriartornerup iluani killissarititaasut malillugit sulisinnaanngussagaluaratta aammalu apeqqutit nalorninarsinnaasut qaangersinnaassagaluarlugit.
Nunanit allanit tv-tigut allatigullu sunnerneqarnerput annertoorujussuuvoq. Mianersunngikkutta tv-kkut assigisaatigullu nunanit allanit sunnerneqarnermit tatineqarsinnaavugut, tassalu taamatut tatineqartigineq siornatigumut pissutsinut nallersuunneqarsinnaassanani. Immap naqqatigut aqqutip(søkabelip) sineriak atuarlugu annertusiartortinneqarnera ilutigalugu internet-ikkut aqqutit pitsanngoriartussapput akikinnerulerlutillu. Taannalu aqqutigalugu tv-kkut assigisaasigullu atortorissaarutigut killeqanngiusartumik atorsinnaalissavagut -matumani nunanit allaneersut aallakaatitat siulliusussaassapput.
Kalaallit Nunaaani kinaassuserput kulturerpullu pigiinnarniarutsigu tv-kkut assigisaasigullu atortorissaarutigut pitsaalluinnartuusariaqarput. Siunissaq eqqarsaatigalugu tv-mut assigisaannullu tapiissutaasartut oqallisigineqalerpata KNR-innaanngitsup aammali allat aningaasatigut tapiiffigineqarnissaat oqaluuserineqartussanut ilaasariaqarpoq.
Tusagassiutit pillugit suleqatigiissitat 2010-meersut, taamani Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisup Mimi Karlsenip pilersitarisaa, decembarimi 2010-mi Tusagassiuutit pillugu isumaliutissiissummik saqqummiussaqarput. Taanna tusagassiuutit pillugit oqaloqatigiinnissamut nutaamut aamma oqallisiginninnissamut aallaaviulluarsinnaavoq.
KNR oqaloqateqarnissamut piareersimavoq. Kalaallit Nunaanni tv-it siaruarterinermilu atortorissaarutit allat pillugit oqallinnissamut KNR piareersimavoq. Kalaallit Nunaaanni taamatut suliaqarnermi atugassarititaasut pitsanngorsarneqarnissaannut KNR peqataarusuppoq. TV-kkut siaruarterinermilu atortorissaarutit siunissamut naleqqussarneqarnissaannut KNR peqataarusuppoq.
Søren Lennert Mortensen
KNR-ip pisortaa
