Arajutsivigit? Nutaarsiassat sapaatip akunnerani pingaarnerit

Sapaatip akunnera Nunatta kujataanit alianartumik nutaarsiassaqarluni aallartippoq. Borgmesterip Jørgen Wæver Johansenip Kistat Lundip sapaatip akunnerata naanerani toqusimanera ataasinngormat oqaluttuaraa. Kistat Lund ilinniartitsisuusimasoq 72-inik ukioqarluni toquvoq. 

- Kîstat maqaasissavatsigit, toqussat tikillugu Narsamut aammalu Kommune Kujallermut tamarmut sinniisuulluarputit. Taamaattorli tuppallersaatigaarput, taarserneqarsinnaanngitsunik eqqumiitsulianik kusanarluinnartunik, amerlasuunik annertuunillu qimatsivigigatsigut, taakku paarilluassavagut taakkulu aqqutigalugit eqqaamaneqarnerit maanna qaqugumullu uumajuassaaq, borgmesteri allappoq.

Ataasinngormat Nunatta aningaasaqarnera pillugu aamma nutaarsiassaqarpoq. Nunatta aningaasaqanera 1,7 procentinik pitsanngoriarsimasoq Nunatta Naatsorsueqqissaartarfiata allaaseraa. 

Grønlandskonsortiet I/S-i ataasinngormat aalassatsitsilaarpoq. Nuuk Imeq A/S-immi matusariaqarnissaanik pilersaaruteqarluni tusagassiuutinut nalunaaruteqarpoq. Tamannalu politikkerit puiaasat pillugit siunissamut qanoq takorluugaqarnerannik ilisimanninnginnerannillu aallaaveqarpoq.  

Atassutip partiiani marlunngormat pisoqalaavippoq. Knud Kristiansen partiimi siulittaasutut tunuarpoq partiimiillu anilluni. Inatsisartuni kommunalbestyrelsimilu attaviitsutut ingerlaannarniarluni Kristiansenip oqaatigaa. Atassummi pisut uani atuarneqarsinnaapput:

Royal Arctic Linep nunaqarfinnut pajuttaatai angivallaarlutik nunaqarfinnut arlalinnut pajunniarnerat ajornakusoortoq pingasunngormat oqaluttuaraarput. Tamannalu umiarsuaatileqatigiiffiup nassuerutigaa. 

Danskit ministeriat Karsten Lauritzen kalaallimik pingasunngormat pisisimanerarmat tamanna isornartorsiorneqangaatsiarpoq:

- Kalaallimilli "pisiaqarnitsigut" tapersersuisut 91-issaat qulakkeerparput. Kalaallit Nunaannit ilaasortat aappaat Folketingip Kalaallit Nunaannut tunngasunut ataatsimiititaliaani siulittaasunngortipparput, taamaaliornikkut suliani pingaarutilinni naalakkersuisunut akerliusumik taasisannginnissaa qulakkeerlutigu.

Taama oqarnera Venstrep Lemvigimi ukiortaarsiornerani pivoq. Kingorna ministerip nassuiaatigaa ataatsimoornermi tusagassiortoqanngissimasoralugu.

Nunatsinnut uteqqilerpugut. Nunatsinni illoqarfiit pingaarnersaanni, Nuummi, ukiut 13-it ingerlanerini 30.000-inik innuttaasoqalernissamik pilersaaruteqarneq Kommuneqarfik Sermersuumi saqqummiunneqarpoq. Tamannalu kommunini allanit pingasuusunit isornartorsiorneqarpoq.

- Inuit 30.000-it Nuummut nuussappata, taava nunap sinnerani qassit inuerutissagaluarpat? Qaasuitsup Kommuniani borgmesterip tullersortaa, Jess Svane oqarpoq.

Kim Kielsen aamma Lars Løkke Damarkimi ataatsimeeqatigiipput. Kingornalu Nunarput Danmarkilu ataqatigiilluarnerat pingaartillugu oqariartuuteqarlutik ataatsimoorussamik tusagassiuutinut nalunaaruteqarput. Taamaaliorput Nunatta Danmarkillu akunneranni pissutsit piffissami kingullermi unammillernartareersut. 

- Danskit kalaallillu Naalakkersuisuisa akornanni nalinginnaasumik, ajunngitsumik ataqqeqatigiillunilu suleqatigiittoqartoq tamannalu nunanut marlunnut iluaqutaasoq isumaqatigiissutigaarput. Tamanna illersorlugulu nukittorsarusupparput ataatsimeeqatigiinnermik kingorna siulittaasut ataatsimut nalunaaruteqarput.

Hermann Berthelsen Qeqqata Kommuniani borgmesteriusoq 60-nik ukiulik ukiuni 18-ni bormesterioreerluni apriilimi qinersisoqalerpat qinigassanngorteqqinnianngitsoq tallimanngornermi allaaseraarput.