Kommuneqarfik Sermersuup periusissiaa kommuninit allanit iluarineqanngitsoq
- Inuit 30.000-it Nuummut nuussappata, taava nunap sinnerani qassit inuerutissagaluarpat? Qaasuitsup Kommuniani borgmesterip tullersortaa, Jess Svane taama oqarpoq.
Kommuneqarfik Sermersuup anguniagaa unitsinneqassasoq, Qeqqata Kommuniani borgmesteri, Hermann Berthelsen, isumaqarpoq. Ineriartortitsinermi innuttaasunillu Nuummi katesuutsitsisoqassappat nuna marlunngorlugu avinneqassasoq Hermann Berthelsenip aviisimut AG-mut apersorneqarnermini oqaatigaa.
- Taamaalillunimi suliffissat nutaat aamma tassani pilersinneqartussaassapput. Uagulli naligiimmik siunissaqarnissarput kissaatigaarput, Hermann Berthelsen AG-mut oqarpoq.
Jess Svanelu assinganik isumaqarpoq.
- Taamatut siuniussaqarneq uagut Qaasuitsup Kommuniani soorunami isumaqatigiunnanngilarput. Qaasuitsup kommunianit borgmesterit allat peqatigalugit siusinnerusukkut oqarnikuuvugut innuttaasut eqiteraluttuinnarnerat pinngitsoortinniarlugu pisortat pigisaannik siammartiterinissaq pisariaqartoq.
Jess Svane taama oqarpoq, ilanngulluguli oqarluni, kommunit piumasaminnik periusissialiorsinnaasut. Kommuneqarfik Sermersuulli periusissiaa ingasappallaarsoraa inuiaqatigiinnullu ataqqinninnginnertut taallugu.
Kommune Kujallip borgmesteria, Jørgen Wæver Johansen, taama sakkortutigisumik isornartorsiuinngilaq. Periusissiarli piviusorsiunngitsoq bormesteri isumaqarpoq.
- Isumaqarpunga ajunngilluinnartoq, Kommuneqarfik Sermersooq taamaalilluni illoqarfiit annersaannut tunngatillugu pilersaaruteqarnera, kisianni pilersaarut piviusorsiorpallaartutut isumaqarfiginngilara, Jørgen Wæver Johansen taama oqarpoq.
Nunarput tamakkerlugu ineriartortinneqarnissaa Qaasuitsup Kommunianit Qeqqata Kommunianiillu oqaatigineqartoq Johansenip isumaqatigaa.
