Atassutip kinguariartornera ingerlaqqittoq
Steen Lynge Atassummi siulittaasup tulliatut atuuffimminit novembarip naanerani tunuarpoq, partiillu siulittaasuata Knud Kristiansenip siulittaasuunerminit tunuarnera partiimiillu ilaasortaajunnaarnera ataasinngornermi nalunaarutigineqarluni.
- Ullumi tujormeqalunga, allatullu ajornartumik tamaanga killittariaqarama, Atassut-mi siulersuisuunerit ilisimatippakka, siulittaasutut Atassut-miillu tunuarlunga, Knud Kristiansen Facebookimi quppernermini ataasinngormat unnukkut taama allappoq.
Knud Kristiansen Atassummi ukiut marluk sinnilaarlugit siulittaasuuvoq. 2014-imi siulittaasunngorniuunnermi taamanikkut siulittaasuusoq Gerhardt Petersen ajorsartippaa.
AAMMA ATUARUK Naalakkersuisunik allannguinerit pingajussaat
Knud Kristiansenip siulittaasuujunnaarnini partiimiillu ilaasortaajunnaarnini pillugit tusagassiortunit apersorneqarnissani kissaatiginngilaa, ilaasunilli angallassinermi kiffartuussinissamik isumaqatigiissutit isornartorsiorneqangaatsiartut pillugit suliap ingerlasimaneranut qullersatut akisussaasutut ineqarnermut, sanaartornermut attaveqarnermullu naalakkersuisuunermini Knud Kristiansen tatisimaneqangaatsiarsimavoq.
AAMMA ATUARUK Knud Kristiansen forlader Atassut
Kiffartuussinissamik isumaqatigiissutit assortuussutaanerat naalakkersuisooqatigiit siuliisa atorunnaarnerinut pissutaaqataavoq, Atassutilli iluani pissutsinut qanoq sunniuteqarsimatiginersoq nalunarluni.
Naalakkersuisooqatigiit atorunnaarnerisa kingorna aviisip Sermitsiap qinersisartunik isumasiuinerata takutippaa Atassutip tapersersorneqarnera annikillisimasoq, isumasiuinerlu naapertorlugu Atassutip Inatsisartuni ilaasortaatitami marluusut aappaa qinersisoqartuuppat annaassavaa.
AAMMA ATUARUK Inuit Ataqatigiit anginerpaanngortut
AAMMA ATUARUK Atassutip siulittaasortaava Gerhardt Petersen: Avataanit tikisinneqartartut pakkersimaarneqartariaqarput
Partiip tapersersorneqarunnaariartornerata Inatsisartunut 2009-mi aallartittup nanginneraa, Atassummi 2005-imi 19 procentinit qinerneqarsinnarluni 2009-mi 10,9 procentinit qinerneqarpoq.
Inatsisartunut 2014-imi qinersisoqarmat Atassummik qinersisut aatsaat taama ikitsigaat. 6,5 procentinit qinerneqarpoq taamaalillunilu Inatsisartuni marluinnarnik ilaasortaatitaqalerluni.
