Nuuk Imeq A/S-ip matuneqarnissaa innersuussutigineqartoq

Nuuk Imeq allappoq Grønlandskonsortiet I/S-ip, teknikkikkut aqutsinermi akisussaasuusup, Nuuk Imermi siulersuisut decembarip aqqaneq-aappaani ataatsimiinneranni Nuuk Imeq A/S-ip tunisassiornerata unitsinneqarnissaa innersuussutigaa.

Innersuussut, taamaalillunilu inaarutaasumik aalajangiineq, aktiaateqartut ataatsimiinneranni
oqaluuserineqassaaq, tamannalu kingusinnerpaamik marsip qiteqqunnerani pissasoq ilimagineqarpoq, Nuuk Imeq taama allappoq.

AAMMA ATUARUK Puiaasat utertittakkat isumaliutigeqqinneqartut

- Avatangiisinut naalakkersuisup 2013-imi avammut nalunaarutaa immiaaqqat imeruersaatillu kulsyretallit puuinik, tassunga ilanngullugit qillertuusat, utertinneqartarnerannik aaqqissuussineq atuutilersinneqartussatut ilimagineqartoq, Nuuk Imeq A/S-ip aningaasaliinissamut pilersaarutaanik unitsitsivoq, Nuuk Imeq A/S-imi siulersuisuini siulittaasoq, Justus Hansen, tusagassiorfinnut nalunaarummi taama oqarpoq.

Grønlandskonsortietimi siulersuisuini siulittaasup, Anders Dam Vestergaardip, Nuummi suliffiit pigiinnarnissaat anguniarlugu Namminersorlutik Oqartussanik isumaqatigiinniarnissamik pilersaaruteqarpoq:

- Neriuutigaarput suliami attuumassuteqartut peqatigalugit Nuuk Imermi immiaaqqanik imeruersaatinillu pitsaasunik maqitsisarnerup ingerlaannarnissaanut aningaasaliisinnaajumalluta Kalaallit Nunaanni puunik aaqqissuussinermut nutaamut ikaarsaariarnissamik aaqqissuteqarsinnaalluta.

Nuuk Imeq A/S-imi piginneqataasut tassaapput Kommuneqarfik Sermersooq, piginneqataassutit 36,28 procentiinik pigisaqartoq, kiisalu Carlsberg Breweries A/S aamma Royal UniBrew A/S, tamarmik immikkut 31,86 procentinik piginneqataassuteqartut. Kingulliit marluk tassaapput Grønlandskonsortiet I/S.

AAMMA ATUARUK Nuuk Imeq kan blive tvunget til at lukke