Nuuk Imeq matusariaqarsinnaavoq
Kommuneqarfik Sermersuumit ullumi nalunaarut tassa taama sakkortutigaaq. Immiaaqqat sodavandillu puui pillugit nalunaarusiap nutaap, tamakku pillugit malittarisassanik sukangareeqisunik ammanerulersitsisup, puukunik utertitsisarneq "qajannarsisissavaa" Nuuk Imermilu aningaasaqarniarneq aamma eqqussallugu, puiaasanimmi utertitsisarneq ukiuni 26-ni atuussimasoq Nuuk Erngup pinngitsoorsinnaanngimmagu.
Kommuneqarfik Sermersuumi kommunalbestyrelse Naalakkersuisunut, sodavandit immiaaqqallu puui pillugit nutaamik nalunaarusiorniarlutik siunnersuuteqartunut, maanna oqarpoq, taakku oqaloqatigerusullugit. Eqqarsaataasunummi ilaammat sodavandit immiaaqqallu puui qillertuusat atorneqalernissaat.
Nalunaarusiaq Nunanut allanut tunngassuteqartunut, Pinngortitamut Avatangiisinullu Pisortaqarfimmit inniminnerneqarsimasoq, kommunalbestyrelsep ilaatigut innersuussutigaa.
Nalunaarusiami erseqqissaatigineqarpoq, aaqqissuussineq maanna atuuttoq avatangiisit eqqarsaatigalugit arlalitsigut ilauarinartuusoq, Nunattalu Kitaani immiaaqqat sodavandillu puuinik utertitsisarneq ingerlalluartoq atuutiinnaqqullugu. Sodavandit immiaaqqallu qillertuusamiittut Avannaani Tunumilu ullumikkut pisiassaapput.
Kitaani puukut utertinneqartarnerisigut 98 procentii atoqqinneqarsinnaapput. Aaqqiineq tamanna ajunngilluinnarpoq, avatangiisinillu mingutsitsinnginnissamut iluaqutaalluni.
Aaqqissuussineq nutaaq avatangiisinut ajoqutaaginnarani Nuuk Imermut ajortorujussuarmik aamma kinguneqarsinnaavoq - sulisummi 50-it missaanniittut soraarsittariaqassammata. Puiaasanik utertitsisoqartarunnaarpat sinerissami sulffeqarfiit allat aamma eqqorneqassapput, taamatuttaaq Royal Arctic Line-imut kinguneqarnerlussinnaalluni, puukummi umiarsuartigut nassiussuunneqartarmata.
