Puiaasat utertittakkat isumaliutigeqqinneqartut
Puiaasanik utertitseriaaseq nutaaq nalilersorneqarnissaalu isumalluarfigineqarput.
- Tamanna ajunngilluinnarpoq ukiuni arlaqalersuni nalilersuinissaq ujartorsimavarput, ukiunilu 15-ngulersuni unammillernissamut tunngasut ajornartorsiutigisimallugit.
Atuisartunut- unammilleqatigiinnermullu aqutsisoqarfiup pisortaa Nicolai Odgaard Jensen oqarpoq.
2012-imi taamani unammilleqatigiinnermut ataatsimiititaliaq nalunaarusiorsimavoq, utertitseriaatsip atorneqartup ajornartorsiutaasarnera pissutigalugu, taamani imeruersaatinut puuliunneqartartut akuerisaasut assigiinngitsut sisamaannaapput.
Aamma atuaruk Nuuk Imeq tunisakinnerusoq
Nuuk Imerup puuliunneqartartut assigiinngitsut marluk sanasarpai, Nuuk Imerlu aqqutigalugu tunisassiunngikkuni unammillersinnaanani.
Nalunaarusiami inerniliussaq tassaavoq maannakkut utertitseriaatsit atuisartunut akisuujusut.
Pinngortitamut, Avatangiisinut Inatsisinillu atuutsitsinermut naalakkersuisoqarfimmi pisortap KNR-imut allalluni uppernarsarpaa Suliffeqarnermut Niuernermullu naalakkersuisoqarfik peqatigalugu maannakkut puiaasanik utertitseriaaseq periarfissalluunniit allat misissorneqartut.
- Aatsaat tamatuma kingorna Naalakkersuisut aalajangissavaat maannakkut utertitsisarneq atuutiinnassanersoq imaluunniit allatut, soorlu qillertuusat atorneqartunut ilaanngutissanersut; aatsaalli misissuisoqareerpat allannguisoqassanersoq aalajangiisoqassaaq.
Aamma atuaruk Nuuk Imeq matusariaqarsinnaavoq
- Nuuk Imerup naammassisinnaanngisaanik piumasaqaateqartoqassanersoq soorunami aarlerissutigaarput, Nuuk Imermi pisortaaneq Berhard Christensen oqarpoq.
Ilutigitilluguli oqarluni ilisimanngikkitsik periarfissat sorlerpiaat sulissutigineqarnersut.
Unammillernerunerli akinik appasinnerusunik kinguneqartitsiuaannanngitsoq Nuuk Imeq isumaqarpoq.
Assartuinermut, nukissiuutinut allanullu aningaasartuutit Kalaallit Nunaanni nioqqutissat ataasiakkaat akiinik qaffassaasartut, Nuuk Imermi pisortaaneq Bernhard Christensen oqarpoq. Puiaasanik utertitsisarnermut unnersuussutit qaqugu piariissanersut suli ilisimaneqanngilaq.
