Kîstat Lund 72-inik ukioqarluni toquvoq
Kîstat Lund 72-inik ukioqarluni Qaqortumi qitiusumik Napparsimmavimmi arfininngornerup sapaatillu akornanni januaarip arfineq-pingajuani toquvoq. Kommune Kujallermi borgmesteri, Jørgen Wæver Johansen, eqqaaniaalluni allappoq sulinera suliaalu puigorneqarnavianngitsut.
- Kîstat maqaasissavatsigit, toqussat tikillugu Narsamut aammalu Kommune Kujallermut tamarmut sinniisuulluarputit. Taamaattorli tuppallersaatigaarput, taarserneqarsinnaanngitsunik eqqumiitsulianik kusanarluinnartunik, amerlasuunik annertuunillu qimatsivigigatsigut, taakku paarilluassavagut taakkulu aqqutigalugit eqqaamaneqarnerit maanna qaqugumullu uumajuassaaq, borgmesteri taama allappoq.
Narsami atuarfimmi ukiuni qulikkuutaani ilinniartitsisutut inuusuttunik ilinniartitsillunilu isummersuinermi saniatigut aamma Nunatsinni kulturikkut suliarpassuaqarpoq eqqumiitsuliortuunermigullu nunani allani ilisimaneqarluarluni. Kîstat Lund ilaatigut titartaasartutut, uulialimmik qalipaasartutut, imilertakkanik qalipaasartutut, pappiaqqanik qiortaasartutut, ilusilersugartalinnik qalipaasartutut, iikkanilu ikaartitikkat qalipagartaanik suliaqartartutut ilisimaneqarpoq.
Ukiut ingerlanerani nersornaatisisarsimavoq. Namminersornerullutik Oqartussat eqqumiitsuliortunut nersornaasiuttagaannik 1989-imi tunineqarpoq, Kunngikkormiullu nersornaasiuttagaannik 1997-imi tunineqarnermigut Ridder af Dannebrogitut toqqagaalluni.
Kîstat Lundip qalipagai Qaqortumi Kommunip ataatsimiittarfianiittut, aamma innersuussutigisinnaavakka eqqartuussivissuarmi Østre Landsretimi qalipagai tivasut ilusilersugartallit . Eqqumiitsuliortutullu ukiorpassuarni suliaqarnermini Nunatsinni, Danmarkimi, Scandinaviami naalagaaffinni, Canadami, Alaskami, Tysklandimi, Japanimi alllanilu saqqummersitsisarpoq.
