Oqaluttualiaq: Gertrud Rask nukittullunilu alapernaatsuuvoq
Danskeq norskinit kingoqqisoq ajoqersuiartortoq, Hans Egede, nunatsinnut 1721-mi tikittoq pillugu atuakkiarpassuaqarpoq. Danskip ilinniarnertuunngorniarfimmi ilinniartitsisup, Margrethe Tjalvep, atuakkat taakku Hans Egedep nulianik Gertrud Raskimik aamma oqaluttaurtut atuarsimavai.
- Hans Egedep inuuneranut tunngasunik atuaqattaartillunga soqutiginnikkiartulerpunga. Inuuneranut tunngasunik atuakkiani Gertrud Rask – amerlanertigut ilagiinnut tunngasunit nuliatut tatiginartutut, uimi saniani naammaginnilluni qeqqisimasutut nassuiarneqartarpoq. Uangalu eqqarsarpunga: Silaqarsimanavianngillat! Tamanna ilumoorsinnaanngilaq’, DR-imut oqarpoq.
AAMMA ATUARUK Gertrud Rask atuakkami nutaami ilisaritinneqarpoq
Danskit ilinniarnertuunngorniarfiani ilinniartitsisup, atuartuutinilu Aasianneereerlutik, Margrethe Tjalvep Gertrud Raskip kiunera paasissallugu soqutiginerulersimavaa.
- Paasissutissat nassaarineqarsinnaasut misissuiffigisariaqarpakka. Arnaq una uiminut naammaginniinnarluni (Kalaallit Nunaannut aaqq.) aallarsimannginneranut killormuuanilli arnaasoq ima: ’Taamaaliussaagut, illillu tununni saninnilu qeqqisimassaanga’-ik oqarsinnaasumut paasissutissanik ujartuivunga.
Oqaluttuarisaanermut paasissutissat amigartut
Gertrud Raskimut tunngatillugu ilisimatuutut Ph.D-mik allaatiginninnissaq eqqarsaataagaluarpoq. Tamannali pillugu oqaluttuarisaanermut allagaatit naammanngitsut Margrethe Tjalvep paasivaa.
Tamatumunngalu taarsiullugu Gertrud Rask pillugu oqaluttualiorniarluni aalajangerpoq. Oqaluttualiami ukiut 300-it missaasa matuma siorna arnap uppertumik ueqartup nunamut takornartamut aallarnissamut ilisarnaatitut pissusai qanoq ittut pisariaqarsimanerisa eqqarsaatigineratulli allaaseraa.
AAMMA ATUARUK Nunasiaataaneq kalaallinit oqaluttuarineqartoq
Oqaluttualiamilu arnaq uiminit kalaallinut inuiaqatigiinnut qaninnerungaatsiartutut allaatigineqarpoq.
- Alapernaatsorujussuanngortippara. Aallarsinnaasimaguni taamaassimasinnaanera eqqarsaatigaara. Kalaallit pillugit paasisaqarusullunilu akulerukkusunnermut alapernaappoq. Arnamik kalaallimik ikinngutilerpara. Taamatullu uimi Hans Egedep upperniarluartup eqqaani aalajangersimanngilaq.
AAMMA ATUARUK Kim Leine Nunatsinnut tunngasumik nutaamik atuakkiortoq
Margrethe Tjalve naapertorlugu Gertrud Rask Danmarkimi inuiaqatigiit akornanni maannamut ukkatarineqarpallaarsimanngilaq.
- Immaqa danskit oqaluttuarisaanerani (Gertrud Rask aaqq.) arnani pingaaruteqarnerpaat ilaattut oqaatigineqarsinnaavoq, tassami Kalaallit Nunaannut attaveqarnitsinnut attuumassuteqarpoq. Aammattaaq uiata kamajasuup sakkortuallaarnerani allamut saalaartarsinnaanera takorloorneqarsinnaavoq.
Gertrud Rask pillugu atuakkiaq ”Iseskrog”-mik ateqartoq atuakkiorfimmi Forlaget Vandkunstenimi saqqummissaaq.
