Gertrud Rask atuakkami nutaami ilisaritinneqarpoq
Gertrud Raskip uiminik Hans Egedemik ukioq 1721-mi nunatsinnut ajoqersuiartortitamik, malinnissimanera atuakkiortup Linda Lassenip uiminik malinnilluni Kalaallit Nunaannut nuunnermi kingorna paasiniassallugu soqutigilersimavaa.Taamanikkut takornarialerisup Gertrud Raskimik oqaluttuarnera Linda Lassenip paasiniaarusulerneranut aallarniisuuvoq.
- Issiallungalu eqqarsaatigilerpara, assut eqqarsarnartortaqaqisoq. Taamanikkut 50-inik ukioqarsimavoq, sisamanillu meeraqarluni. Maanna uanga 59-inik ukioqarpunga, isumaqarpungalu nalunngisat qimallugit avannamut nuunneq assut sakkortoqisoq. Uiusumut malinnitsitut siullersaalluni Gertrud Rask nunamut maanga tikeqqaartuuvoq, eqqarsaatigilerparalu suliassaq qanoq iliorluni naammassisinnaasimaneraa. Uanga asuli uinnik avannamut malinninnianngilanga, avannamukaqataassaguma nammineq suliassannik peqartariaqarlunga eqqarsarpunga, Linda Lassen taama oqarpoq.
Linda Lassennillu ukiut marluk Nuummiinnermini suliarisaa tassaasimavoq Gertrud Raskimik atuakkiorneq, qanimullu inummut tassunga ilisimasaqarusulerneq. Oqartoqarsinnaammammi allattukkat assigiinngitsdut kisiinnangajammik Hans Egedemut tunngassuteqarmata, nulianulli tunngasut paasissutissat annikitsuinnaat allattugaataallutik.
Ajoqersuiartortitap nulia inuttut kinaasimava?
- Atuakkianni Hans Egede ilaqutaqanngikkuni soqutiginarpallaarsimassanngikkaluarpoq. Meeraallu tassaasimapput ataataminnik kalaallit oqaasiinik ilinniartitsisut, Gertrud Raskilu uiminut naleqqiullugu ulapputeqarpallaannginnerugami tassaasimavoq ilaqutariinnik katersuutsitsisoq. Uia kristumiutut perorsaasuuvoq, namminerlu taamatut aallussisuunani. Illuatungaatigulli uini ulluinnarni inuunermut tunngasunik oqaluttuussinnaasarsimavaa, ilaatigut nerisassiornermut nappaatinullu tunngasunik ilisimasaqarlualersimalluni.
Atuakkiortullu oqariartuutaa pingaarneq tassaasimavoq, Gertrud Raskip nuliaasutut inissisimaannarsimannginnera. Tassami nuliaasoq kalaallinut attaveqaataalluarsimanermut pingaaruteqarluartuusimammat.
Ullumikkut inuunitsinnut atuagaq sumut atorneqarsinnaava?
-Hans Egede pissutsinik allannguisupalaatut isigalugu eqqaassutissaa qalipaammik aappaluttumik 70-ikkunni kuerarneqarpoq. Uagut nalitsinni, tusakkakkalu malillugit, taamanikkut pineqartut tassaapput 'uagut taakkulu', allamik naamik. Tassalu Hans Egedep kalaallillu akornanni pisut pineqarlutik. Kisianni tassa taamaaqqissaanngilaq. Ataatsimooqatigiineq pissutsillu taamani pisut aallaaviupput. Kalaallit qallunaallu attaveqatigiinnerat ataatsimoornerallu qalipaatigissaartumik assiliartalersorniarsimavara, pissutsit taamanikkut aallartiffianniit, Linda Lassen oqarpoq.
Atuagaq oqaluttuarisaanermut tunngassuteqarluinnarpoq, pisuusaartitatut taaneqarsinnaalluni, misissuinerpassuillu atorlugit suliaalluni. Ilaatigut Hans Egedep Poul Egedellu atukkiiaanniit eqqaamaamasalersaarutinit aallaaveqarluni.
