Zelenskyj-p illersornissamut ministerertik allamik taarserusukkaa

Illersornissamut ministererput, Oleksij Reznikov, Rustem Umerovimik taarserusuppara.

Zelenskyj Ukrainemut ullukkuutaartumik sapaatiummat unnukkut nalunaaruteqarami taama oqarpoq.

Ministerertik allamik taarserneqarnissaanik siunnersuutini inatsisartuminnut ulluni tulliuttuni akuereqquniarini, Zelenskyj nalunaarpoq.

- Oleksij Reznikov ullut 550-it sinnerlugit sorsoqataavoq, Zelenskyj oqarpoq.

- Ministereqarfipput ataatsimut isigalugu sakkutuutsinnut inuiaqatigiitsinnullu tunngasuni allatut suleriuseqalertariaqarlunilu siunersiueqateqalertariaqarpoq, Ukrainep præsidentia siunnersuumminut tunngavilersuinermini oqarpoq.

Reznikov 2021-mi novembarimili illersornissamut ministeriuvoq. Taanna nunat killiit sakkutooqarfiisa Ukrainemut dollarsinik milliardilikkuutaanik nalilinnik tunissuteqarnikkut tapersersuinissaannik qulakkeerisooqataasunut ilaavoq.

Taassumali ministereqarfia peqquserluffiusartutut pasillerneqarpoq. Taamatulli pasillerneqarnera mamarliiniartoqarneranik aallaaveqartoq, Reznikov oqarpoq.

Zelenskyj-lli siunnersuutaa Ukrainep inatsisartuisa aatsaat akuerippassuk, illersornissamut ministerertik allamik taarsissaaq. 41-nilli ukiullip Rustem Umerovip illersornissamut misterinngornissaanik Zelenskyj-p siunnersuutaa Ukrainep inatsisartuini amerlanerussuteqartunit akuerineqassangatinneqarpoq.

Umerov Ukrainemi namminersortunngorsaanermut aningaasaateqarfinni anginerpaat ilaanni maanna pisortaavoq.

Rustem Umerov Ukrainep Inatsisartuinut siornatigut qinigaanikuuvoq aamma nunani sinnerlugu pingaarutilittut inissisimalluni isumaqatiginninniaqataasarnikuuvoq.