Zelenskyj nunat suliffissuaqarfiusut Japanimi ataatsimeersuarnissaannut najuukkiartortoq
Ukrainep præsidentia, Volodymyr Zelenskyj, nunat suliffissuaqarfiusut annerit arfineq-marluk, G7-imik aamma taaneqartartut, Japanimi ataatsimiinnerannut atatillugu attaveqaatit aqqutigalugit peqataasussaagaluarpoq, Zelenskyj-lli Japaniliarnissani aalajangerpaa. Tusarfiit Ukrainemeersut taama ilisimatitsipput.
Nunat G7-it Japanimi illoqarfimmi Hiroshimami ullumi tallimanngornermi ataatsimiilersussaapput, Zelenskyjlu tassa peqataanialersaarluni. Ukrainep naalagaaffiata isumannaallisaaniaqatigiivineersoq, Oleksij Danilov, taama ilisimatitsisoq, nutaarsiassaqartitsivik Reuters allappoq.
- Pingaarutillit pillugit ataatsimiinnermi aalajangiisoqartussaavoq, soqutigisattalu illersorneqarnissaat pillugu præsidentitta najuunnissaa pingaaruteqarpoq, Oleksij Danilov Ukrainemi naalagaaffiup tv-qarfianut oqartoq Reuters allappoq.
Zelenskyj Europami nunanut assigiinngitsunut sapaatit akunnerata siuliani tikeraareerluni nunat G7-it ataatsimeersuarnerannut maanna peqataassaaq.
Nunat G7-it tassaapput Canada, USA, Tuluit Nunaat, Tyskland, Frankrig, Italia Japanilu. Nunarsuarmi aningaasarsiornerup affangajaa nunani taakkunaniippoq, EU-lu aamma ataatsimeeqataasarluni.
Ruslandip Ukrainemik saassussinerani Ruslandimut pillaatitut iliuusissat annertusarneqarnissaat Japanimi ataatsimiinnermi ilaatigut eqqartorneqassapput, assersuutigalugu Ruslandip aligoqqinnik nunanut allanut tunisassiornera eqqorniarneqassanersoq eqqartorneqassalluni.
Ruslandip Ukrainemik saassussinerani nunanit killernit assigiinngitsunit pillaatitut assigiinngitsunik iliuuseqarfigineqarpoq, iliuutsilli Ruslandimik arlaatigut eqquisimanerannik suli takussutissaqanngilaq.
