Tuluit Nunaat timmisartuaqqanik ungasianiit aquttakkanik Ukrainemut tunissuteqartoq

Silaannakkut saassussisoqarnerani raketit illersuutissat timmisartuaqqallu ungasianiit aqunneqarsinnaasut, Tuluit Nunaata Ukrainemut tunissutiginiarpai.

Tuluit Nunaata ministeriunerata, Rishi Sunakip, tamanna ullumi ataasinngornermi nalunaarutigissagaa ilimagineqartoq, ministeriunerup allattoqarfia ilisimatitsivoq.

Timmisartuaqqat ungasianiit aqunneqarsinnaasut 200 kilometerit sinnerlugit ingerlaarsinnaapput.

Raketit timmisartuaqqallu ungasianiit aqunneqarsinnaasut, Ukrainep præsidentiata Volodymyr Zelenskyj-p Tuluit Nunaannut tikinnerata ulluani tunniunneqarumaartut neriorsuutigineqarpoq.

Tuluit Nunaat sakkussianik ungasissumut atorneqarsinnaasunik Ukrainemut aatsaat tunissuteqalinngilaq, raketimmi ungasissumut atorneqarsinnaasut tuluit sapaatit akunnerata siuliani tunissutigaat. Tuluit nunarsuarmi nunani siullersaallutik sakkussianik tamakkuninnga Ukrainemut taamaasilluni tunissuteqarput.

Zelenskyj Europami nunanut assigiinngitsunut angalaleruttorpoq, Tuluillu Nunaannut maanna tikeraartussanngorluni. Zelenskyj Tysklandip illoqarfiisa pingaarnersaannut Berlinimut, Frankrigip illoqarfiisa pingaarnersaannut Parisimut Italiamilu illoqarfiit pingaarnersaannut Romimut sapaatit akunnerata naanerani tikeraarpoq.

Londonimut maanna tikeraarniarnini Zelenskyj-p ataasinngornermi ullaakkut nalunaarutigaa.

- Ullumikkut - London. Tuluit Nunaat illersornissaqarfitta nunakkut silaannakkullu soriarsinnaassusaanut ikiuisinnaavoq. Suleqatigiinnerlu taanna ullumi nanginneqassaaq.

- ikinngutiga Rishi ataatsimeeqatigissavara. Illuatungeriilluta sinniisuutitavullu aamma aqqutigalugit assigiinngitsutigut isumaqatigiinniassaagut, Zelenskyj inoqatinut attaveqaqatigiittarfikkut Twitterikkut ilaatigut allappoq.

Volydymyr Zelenskyj Londonimut tikittoq, Tuluit Nunaanni naalakkersuisut ataasinngornermi ullaap tungaani uppernarsarpaat.