Nunat aqqi danskisoortut ukiut 12-it matuma siorna itigartitsissutigineqareersut
Sooruna Julianehåb Jakobshavnilu atorneqarunnaartut? KNR.gl-imi sapaatit-akunnerata siuliani taama qulequtalimmik allaaserisaqarpugut, Dansk Folkepartiimeersullu Søren Espersenip ministeriunermut Lars Løkke Ramussenimut apeqquteqaataa tunngavigalugu taama allaaserisaqarpugut.
Nunatsinni illoqarfiit, nunaqarfiit asimioqarfiillu aqqi kalaallisoortut danskit taakkununnga taaguutigisaannut taarsiullugit Danmarkimi allagaatini pisortatigoortuni atorneqartalersimanerat Espersenip paasiuminaatsippaa.
- Kalaallit Nunaanni nunat aqqi danskisoortut pisortatigoortumik atorneqarunnaavissimanerinut suna tunngavilersuutigineqarsimanersoq, aammalu tamatumunnga Folketingimi qanga akuersissutigineqarsimanersoq ministeriunerup ilisimatitsissutigisinnaavaa?, Kalaallit Nunaannut tunngasunut ataatsimiititaliaq Espersen sinnerlugu taama apeqquteqarpoq.
Nunat aqqi danskisoortut maqaasigai
Apeqquteqaatini KNR-imut ima tunngavilersorpaa:
Kalaallit sumiiffinnut taaguutaat Danmarkimi pisortatigoortumik atulissagaluarutsigut tamanna kanngunarluinnassaaq, taaguusersuisarnitsinnummi kulturimik pigisaqareeratta, KNR-imut taama oqarpoq.
AAMMA ATUARUK Sooruna Julianehåb Jakobshavnilu atorneqarunnaartut?
Espersenip aamma nunat aqqi danskisoortut atorneqarunnaarnissaannik kina akuersissuteqarsimanersoq paaserusullugu oqaatigaa.
- Soormiuna oqaluuserineqarsimanngitsoq. Uanga tusagaqanngilanga aamma qanga taamatut pisoqarsimanera ilisimaneqarunanngilaq.
Nunatsinni illoqarfiit nunaqarfiillu aqqi Danmarkimi allagaatini eqqaaneqartillugit kalaallisut danskisullu allanneqartarnissaannik siunnersuut isummerfigeqqullugu Espersenip taamani ministeriunerusumut Anders Fogh Rasmussenimut 2005-imi isummerfigeqquaa.
- Naalakkersuisut qitiusumillu allaffeqarfiup allagaqaatini assigisaanilu pisortatigoortuni Kalaallit Nunaanni sumiiffiit eqqaaneqartillugit aqqi kalaallisut danskisullu siunissami taasarsinnaavaat, danskisoortaa ungasuulerlugu, soorlu assersuutigalugu Ilulissat (Jakobshavn), Dansk Folkepartiimeersoq taamani taama apeqquteqarpoq.
Itigartitsissutigineqartoq
Ministeriunerulli Anders Fogh Rasmussenip danskillu naalakkersuisuisa tamanna isumaqataaffiginngilaat. Aamma suna pissutigalugu nunat aqqi kalaallisoortut Danmarkimi allagaatini pisortatigoortuni aqqit danskisoortut pinnagit atorneqartalersimanersut akissuteqarfigaa.
- Paasissutissiinermut allatigullu pisariaqartillugu sumiiffiup danskisut taaguutigisimasaata taaneqarnissaa naleqqussinnaavoq, Kalaallit Nunaannili oqaatsitigut ineriartornerup malinneqarnissaa naalakkersuisunit pissusissamisoortutut isigaarput, aamma allagaqaatini pisortatigoortuni, malittarisassani assigisaanilu, Anders Fogh Rasmussen 2005-imi taama akissuteqarpoq.
Taamanilu ministeriunerusup suleriaaserineqartup allanngorteqarnissaa pissutissaqarsorinngilaa.
- Nunat aqqisa kalaallisoortut allagaqaatini pisortatigoortuni, malittarisassani assigisaannilu qanoq atorneqarnissaannut najoqqutassiornissaq naalakkersuisut pisariaqarsorinngilaat.
AAMMA ATUARUK Danske eller grønlandske stednavne
KNR-ip akissuteqaat 2005-imeersoq Espersenimut saqqummiuppaa. Nunat aqqi kalaallisoortut pillugit ukiut aqqaneq-marluk matuma siorna apeqquteqaateqarsimalluni tamatumunngalu akissuteqarfigineqarsimanini puigorsimallugu nassuerutigaa. Kialli taamatut aalajangiussaqarsimaneranut akineqarnissani suli ujartorpaa.
- Danmarkimi kulturikkut oqaluttuarisaanermut taama pingaaruteqartigisumik suna tunngavigalugu allanngortitsisoqarsimanera suli akissutissarsiffiginngilara. Allaffissornikkut aalajangiinikkut taamatut allanngortitsiinnartoqarsinnaanngilaq. Taama siammasitsigisumik aalajangiisoqartillugu Folketingimi minnerpaamik ilisimatinneqartariaqarpoq, Søren Espersen, ministeriunermit Lars Løkke Rasmussenimit akineqarnissaminik utaqqisoq taama oqarpoq.
