WWF-ip saarulliit pillugit kukkusoqarsimanera KNAPK-mut utoqqatsissutigaa
Kalaallit aalisarnerinut akornutaasumik suliniaqatigiiffiup immikkoortortaqarfippassuisa akornanni ataqatigiissaarisoqannginneranik KNAPK-p sakkortuumik isornartorsiuinera Nunarsuaq tamakkerlugu pinngortitaq pillugu suliniaqatigiiffiup generalsekretæriata Gitte Seebergip isumaqatiginerarpaa.
- Kalaallit Nunaanni aalisarnerit pillugit WWF-ip immikkoortortaqarfiisa nunani allaniittut eqqunngitsumik nalunaaruteqarsimanerat ilumoorpoq.
Aamma atuaruk KNAPK-p WWF sakkortuumik isornartorsiorpaa
- WWF-imi immikkoortortaqarfiit allat siornali piumaffigaagut Kalaallit Nunaanni aalisarneq pillugu nalunaaruteqartoqassatillugu tamanna WWF Danmark peqatigalugu ataqatigiissaarneqartassasoq, taamaaliornikkut WWF-ip pisortatigoortumik nalunaaruteqannginnerani kalaallit aalisartut kattuffiillu oqaloqatigeqqaarnissaannut periarfissaqarniassagatta.
- Tamannalu Barentsip Imartaani saarullinniarnermut tunngatillugu pisimanngilaq. Tamanna uannut annerusumillu Kalaallit Nunaanni aalisarnermik suliffeqarfinnut uuminartupilussuuvoq. Tamannalu soorunami utoqqatsissutigaarput, Gitte Seeberg oqarpoq.
Aamma atuaruk Pinngortitaleriffik: Nipisaat qanoq amerlatigineri nakkutigisariaqarput
Ataqatigiissaarineq annertusarneqassaaq
Aalisarnerup piujuaannartitsinissaq tunngavigalugu ingerlanneqarneranut MSC-mik nalunaaqutsiinissamik inassutigineqarnissaa qanittuararsuusimagaluarpoq, sulinerli WWF-ip Tysklandimi immikkoortortaqarfianit kinguarsarneqarsimalluni. KNAPK-llu isornartorsiunermini qalerallit nipisaallu pillugit paasissutissanik eqqunngitsunik saqqummiussisoqartarsimaneranut allanik aamma assersuuteqarpoq.
Taamaammat Kalaallit Nunaanni Aalisartut Piniartullu Kattuffianni siuttut aalajangerput soqutigisaqaqatigiiffiit WWF-imut attuumassuteqartut tamaasa suleqatigineqarnerat minnerpaaffimmiitinneqassasoq.
WWF-ip Danmarkimi generalsekretæriata nunarsuaq tamakkerlugu attaveqaqatigiinnerup pitsanngorsarneqarnissaa maanna sulissutiginialerpaa.
- Nunani aalisarneq pillugu politikkimik sammisaqarfiusuni generalsekretærit tamaasa allagaqarfigissavakka, Kalaallit Nunaata imartaani aalisarnermut tunngatillugu WWF Danmarkimut ataqatigiissaarisoqartannginnera akuerineqarsinnaanngitsoq erseqqissaatigalugu.
- WWF Danmarkip Kalaallit Nunaat WWF-imi immikkoortortaqarfinnut allanut tunngatillugu illersorusuppaa, Kalaallit Nunaannilu kattuffinnit, suliffeqarfinnit aalisartunillu immersorneqarnerput malittaralugu tamanna ingerlatiinnarusullutigu.
- Puisit pillugit nalunaarusiatta saqqummiunneqarneranut atatillugu aamma taamaaliorpugut, tamatumani WWF tamaat sinnerlugu Kalaallit Nunaanni puisinniarneq akuerineqarluni, Gitte Seeberg taama erseqqissaateqarpoq.