Wood Buffalo Albertamiittoq AWG 2022-imik aaqqissuisuussasoq
Arctic Winter Gamesip nunani tamalaani ataatsimiititaliaata præsidentia John Flynn taama oqarpoq:
- Wood Buffalop, Albertamiittup, 2022-mi Arctic Winter Gamesertoqarnissaanut aaqqissuisuusussaanera nalunaarutigisinnaallugu nuannaarutigaara. Timersortartut, sungiusaasut kulturikkullu nuimasut 2000-ngajaat 2022-mi marsimi katersuutissapput, Wood Buffalomi pikialaartitsissallutik, John Flynn, tusagassiutinut nalunaarummi ilaatigut oqarpoq.
AAMMA ATUARUK Kalaallit Nunaata saqqarmiunnattaavi 65-it angusaapput pitsaalluinnartut
Kommunit marluk 2022-mi Arctic Winter Gamesertoqarnissaanut qinnuteqarput, Grand Prairie, aamma Albertameersoq, qinnuteqartut aapparalugu. Wood Buffaloli tassa toqqarneqarpoq.
- Toqqaaniarneq ajornakusoorsimaqaaq. Kommunit marluk taakku timersortarfeqarput atorneqarsinnaalluartunik, nukissaqarluarlutillu piumassuseqarput, John Rodda, Arctic Winter Gamesip præsidentiata tullia, toqqaaniarnermullu ataatsimiititaliami siulittaasoq, oqarpoq.
Wood Buffalop aaqqissuisuunissaa pillugu siunissami ungasinngitsumi atsioqatigiittoqarumaarpoq.
Whitehorse, Yukonimiittoq, aappaagu 2020-mi Arctic Winter Gameserfiussaaq, Issittormiut unammiuaartarnerat ukiunik 50-inngortorsiornerat tassani nalliussineqassalluni. Whitehorsemi 1970-imi siullerpaamik Arctic Winter Gamesertoqarpoq.