AWG 2018 Kalaallit Nunaata saqqarmiunnattaavi 65-it angusaapput pitsaalluinnartut
- Eqqarsaatigigaanni Kalaallit Nunaat nunamut allamut unammiartorsimasoq assorsuaq angusarissaarput, 2016-imimi unammineq Nuummi ingerlanneqarsimavoq. Taamaattumik taamanikkut amerlanerujussuarnik peqataatitaqarpugut 81-inillu saqqarmiunnalluta, Finn Nielsen oqarpoq.
Timersuutigisani siornatigut Kalaallit Nunaata saqqarmiunnassutigisimanngisaani Kalaallit Nunaat saqqarmiunnammat pingaartumik nuannaarutigaa.
Ilutigitillugu timersuut Nunatta assut saqqarmiunnassutigisartagaa sangusaarneq ukioq manna unammissutaanngilaq. Issittumi nunallit unammiuaaqatigiinneranni ukioq manna unammiffigisaanni sangusaarfissaqannginnera pissutigalugu.
AAMMA ATUARUK Kalaallit Nunaata ujaminnattai amerliartorput
Unammissutaasuni nutaani Nunatta peqataaffigisaani saqqarmiunnappugut, tassalu Eqqillit Pinnguaataanni assammik unammeqattaarnerni napparummillu ajattaanermi guldinnakkatta. Assammik unammeqattaarnerni kalaallit nukappiarartaasa ukioq manna Yokonermiut ajugaaffigaat. Taakkuugaluarput Issittumi nunallit unammiuaaqatigiinneranni kingullerni arfineq pingasuni guldinnattuusarsimasut.
Taamaattumik saqqarmiunnattat 65-it assorsuaq angusarissaarutaasut, Finn Nielsen isumaqarpoq.
- Kalaallit Nunaata 2014-imi Alaskamiittumi Fairbanksimi angusarisimasai saqqarmiut 61-it qaangernissaat siunertaasimavoq. Saqqarmiunnattallu 65-inngormata assorsuaq angusarissaartugut, Finn Nielsen erseqqissaavoq.
AAMMA ATUARUK Bjarne Hansen bronzennappoq
Taassuma ilanngullugu eqqaavaa timersuutini illup iluani ingerlanneqartartuni peqataasunut unammiffiit mikivallaarnerat unamminartuusimasoq, Kalaallimmi unammisartuisa sungiusimasaannut naleqqiullugu mikinerujussuarni unammisarsimagamik.
- Isumaqarpunga kalaallit unammiartortitaasa tamanna sungiunniaqqaarsimassagaat. Taamaakkaluartorli inerneri ajunngilluinnartut, Finn Nielsen KNR-imut oqarpoq.
Canadami nunap immikkoortua Alberta North AWG 2018-imi Issittumi nunallit unammiuaaqatigiinneranni saqqarmiunnannerpaavoq. Tassanngaanniimmi peqataasut 133-nik saqqarmiunnammata.
