AWG 2018 Bjarne Hansen bronzennappoq
Ujakkaarluni sprintimik unamminerit tallimanngornermi ingerlanneqarput. Bjarne Hansen finalimut annguppoq, tassanilu unamminermini 3-nngorluni.
- Nuan', artornaq. Aqqutaa tamaat siulliuinnaasariarlunga qummukajaaq siulleq anguteqqaarpunga, taava apuukkiartulerluta qasuallaaqigama arriillisooqqallunga anguteqqippunga, Bjarne Hansen apuuteqqammiinnarluni KNR-imut taama oqarpoq.
AAMMA ATUARUK Bjarnep AWG 2016-imi kuultinnattani illersussavaa
Sungiusaasoq naammagisimaartoq
Bjarne Hansenip sprintimi unamminissaa sioqqullugu ujakkaartartut sungiusaasuata Øystein Slettemarkip ujamminnassinnaanissaa siulittuutigaa, tamannalumi aamma eqquuppoq.
- Kuultinnannissani siunniuteqqagaluarpaa, unammisaali sukkavallaarput. Kuulti ungasippaa, sølvimulli qanikkaluarpoq. Kisianni bronzennappoq, tamannalu aamma angusaavoq kusanarluinnartoq, Øystein Slettemark KNR-imut taama oqarpoq.