AWG 2018 Kalaallit Nunaata ujaminnattai amerliartorput
Kalaallit Nunaata maannamut ujaminnattai ippassaq ullup ingerlanerani amerleriangaatsiarput, ippassarmi ullaakkut 18-ioriarlutik maanna katillugit 27-nngorsimapput.
Arctic Sportsimi peqataasoq Tonny Fisker taakkununnga ilaavoq. Taanna ataatsimik kuultinnallunilu bronzinik marlunnik pissarsivoq.
Mick Josefsen Arm Pullimi aamma kuultinnappoq, Andreas Johansen Lone Nikolajsen Hansenilu Arctic Sportsimi aamma sølvinnallutik.
Sisoraaserluni ooqattaasartartoq Sondre Slettemark Biathlonimi aappassaa ippassaq sølvinnappoq, kalaallillu Dene Gamesimi peqataatitai aamma ujaminnapput, Kalaallit Nunaata maannamut ujaminnattai katillugit tassa 27-nngorlutik: Kuultit arfineq-pingasut, sølvit qulingiluat bronzillu qulit.
Futsalertoqarnerani ullumi semifinalertoqassaaq, Kalaallit Nunaallu semifinalini tamani peqataassaaq.
Nukappiaqqat inuusunnerit Northwest Territoriesimut ippassaq unammipput, ajugaallualaavippullu, Northwest Territoriesimi 22-1-imik ajorsartinneqarami. Kalaallillu Alaska kingorna taava naapippaat, 8-0-imik tassani ajugaanerminni semifinalimut anngullutik. Northwest Territories tassani unammeqqinneqassapput.
Nerrivimmi arsaararnermi sulorarnermilu unamminerit ullumi pissanngatigineqassaqaat. Arctic Winter Gamesimi pisut KNR.gl-ikkut malinnaavigineqarsinnaapput.
