Wammen: Kalaallit Nunaanni alapernaarsuineq nukittorsarneqassaaq
Kalaallit Nunaata Issittullu illersorneqarnerata nukittorsarneqarnissaa pillugu siunnersuuteqarfiusumik nalunaarusiap upernaaq manna saqqummiunneqarnissaa sioqqullugu taama oqarpoq.
- Aap, umiarsuaateqarpugut sineriak atuarlugu angalasunik, aamma timmisartuuteqarpugut kiisalu aamma Siriusip alapernaarsuisui pigalutigit. Tamakku pigigaluarlutigit Kalaallit Nunaat taama isorartutigitillugu suut tamaasa nakkutiginissaat ajornakusoortupilussuuvoq.
AAMMA ATUARUK Timmisartuaqqat ungasianit aquttakkat qaammataasallu Issittumi atorneqalernissaat kaammattuutigigaat
Danskit illersornissamut ministeriata Nicolai Wammenip Aarhusimi Kalaallit Illuutaannut pulaartut allat assingalugit Kalaallit Nunaata isorartunerujussua ilisimaarilluarpaa.
Aammattaaq Kunngeqarfimmi kvadratkilometerit tamarluinnaasa oqartussaasunit nakkutigineqassappata suut pisariaqartinneqarnersut ilisimaarivaa.
Issittup illersorneqarnissaata qanoq aaqqissuunneqarnissaanut siunnersuuteqarfiusumik danskit kalaallillu nalunaarusiaat apriilimi saqqummiunneqartussaavoq. Ministerillu nakkutilliinerup nukittorsaavigineqarnissaa maannangaaq neriorsuutigereerpaa.
- Misissugassatta ilagaat susoqarneranik tamakkiinerusumik nakkutilliinissatsinnut suut pisariaqartinneqarnersut. Assersuutigalugu umiarsuarmik ajutoortoqassagaluarpat, aammalu Kalaallit Nunaanni sumiiffinni ullumikkut malittarissallugit pisariusuni tamakkiinerusumik nakkutilliinissaq eqqarsaatigalugu.
Tamannalu silaakkannukkut alapernaarsuinermut atortorissaarutit nutaaliaasut atorlugit pisinnaasoq, ministeri isumaqarpoq.
Qaammataasat atorlugit nakkulliinissaq aamma periarfissaavoq
- Taamaammat ilaatigut qaammataasat atorneqarsinnaanersut misissorparput, aammali nunarujussuup nakkutigineqarnissaa eqqarsaatigalugu inunnik ikiortarialinnik ikiuinissamut timmisartut ungasianit aquttakkat atorluarneqarsinnaassapput.
Danmark nammineerluni qaammataasanik aallartitsissanersoq imaluunniit nunat allat qaammataasaataannik atuiniarnersoq nalunarallarpoq.
AAMMA ATUARUK Timmisartuaqqat alapernaarsuutit inuttaqanngitsut akisuallaaqaat
Qaammataasat atorlugit nakkutilliisoqarneratigut timmisartut unioqqutitsillutik Kalaallit Nunaat qulaallugu angalasarnerisa tamakkiinerusumik nakkutigineqarneqarnissaannut nukittorsaataassanersoq ministerip oqaaseqarfigiumanngikkallarpaa.
- Qaammataasat atorlugit Kalaallit Nunaat tamakkiinerusumik nakkutigineqarsinnaavoq. Timmisartut qulaavaasarnerat tamatumunnga ilaatinneqassanersoq oqaatigissallugu siusippallaarsoraara.
Illersornissaq pillugu isumaqatigiissummut nutaamut, 2017-imi isumaqatigiinniutigeqqinneqartussamut atatillugu, Kalaallit Nunaanni illersornikkut suliassat Folketingimi isumaqatigiissutigineqartussaapput.
