Timmisartuaqqat alapernaarsuutit inuttaqanngitsut akisuallaaqaat
Timmisartuaqqat alapernaarsuutit inuttaqanngitsut Issittumi alapernaarsuinermut piukkunnarsinnaasut timmisartumit sorsuummit nutaaliamit akisunerupput. Berlingske Tidende taama allaaserisaqarpoq.
Timmisartuaqqat alapernaarsuutit inuttaqanngitsut taamaattut sulisunik immikkut ilinniarsimasunik 500-nik pisariaqartitsissapput.
Timmisartuaqqat alapernaarsuutit inuttaqanngitsut anginerit ilaat - Global Hawks - issittumi atussallugu piukkunnarsinnaasoq, nunami aallartarfeqartillugu 1,3 milliardit koruunit missaannik, timmisartup sorsuutip akiata pingasoriaataanik akeqarpoq, Berlingske, Sakkutooqarnikkut Ilisimatusarfiup nalunaarusiaani nutaami paasissutissanik pissarsisisimasoq taama allaaserisaqarpoq.
Timmisartuaqqat alapernaarsuutit inuttaqanngitsut qutsissupilussuarmit, issittup anorersuinit akornusersorneqaratik, Issittup ilarujussuanik alapernaarsuisinnaapput.
Timmisartuaqqat alapernaarsuutit inuttaqanngitsut Kalaallit Nunaanni atussallugit piviusorsiunngikkaluartoq, danskit politikeriisa taamaativissorsimanngilaat. Nalunaarusioqataasullu, ilisimatuut pisortaata Kristian Søby Kristensenip, qaammataasat timmisartullu sorsuutit aamma periarfissaasinnaanerannik siunnersuuteqarpoq.
Taakku timmisartuaqqanit alapernaarsuutinit inuttaqanngitsunit pitsaanerunngikkaluarlutik imaatigut angallannerup pitsaasumik alapernaarsuiffiginissaanut piukkunnarluinnarput.
