Vivian Motzfeldt Demokraatini ilaasortanngortoq
Vivian Motzfeldt Siumumi ilasortaasimasoq Nunanullu Allanut Tunngasunut naalakkersuisuusimasoq Demokraatini ilaasortanngorpoq.
Vivian Motzfeldt Siumumit marsip 17-ianni ilaasortaajunnaarpoq, Siumup naalakkersuisoqatigiinnit tunuarnerata kinguninngua.
Siumumi ukiut 20-t sinnerlugit ilaasortaareerluni ilaasortaajunnaarpoq.
Naleqartitat assigiittut
Marsimili attaviitsooreerluni maanna Demokraatinut ilaasortanngorpoq.
- Uannut pingaaruteqartorujussuusimavoq sulinera nangeqqissagukku uanga naleqartitannut naapertuuttunik sulisunik peqatissarsiussallunga. Demokraatit uanga naleqartitama assinganik naleqartitaqarput, Vivian Motzfeldt oqarpoq.
Siumumit ilaasortaajunnaarani suli, Nunanut Allanut Tunngasunut naalakkersuisuuvoq.
Kalaallit Nunaata, Danmarkip USA-llu akornanni pissutsit jannuaarimi ajornerpaaffianni, Danmarkimi Nunanut Allanut Tunngasunut ministeri Lars Løkke Rasmussen (M) peqatigalugu Amerikami nunanut allanut tunngasunut ministeri ataatsimeeqatiginiarlugu USA-miippoq.
Angalaneq pingaarutilik, tamatuma kingorna Nuummut tikimmat inunnit tikilluaqquneqarluni ersaattaanneqarpoq.
Vivian Motzfeldt naalakkersuisunngoqqissanersoq suli nalorninarpoq, partiimulli ilaasortanngorfigisaminut iserluaqqaassalluni KNR-imut oqaatigaa.
