Vittus Qujaukitsup Dalai Lama naapippaa
Dalai Lama-mik oqaloqateqarneq aamma Tibetimiunik Indiamut qimaasimasunik ataatsimeeqateqarneq. Misigisat tamakkua ilaat nassataralugit, Vittus Qujaukitsoq, KNI-mi attaveqarnermut pisortaasoq, ullumi Sisimiunut tikissaaq.
Taamaattorli Vittus Qujaukitsoq KNI sinnerlugu Indiamiinngilaq, tassa taassuma Indiameeqatigai inuit aqqaneq-marluk, nunarsuatsinni nunani assigiinngitsuni qulini namminersorneruffiusuneersut.
Ilisimasanik isummanillu tibetimiunut ingerlatitseqqinnissaq, namminersornerulerumallutillu ilungersuuteqarneranni ikiuunnissaq, taakkua siunertaraat. Tamanna pivoq illoqarfissuarmi New Delhi-mi sapaatip-akunnerata uuma aallartinnerani ulluni marlunni ataatsimeeqatigiinnermi.
Aatsaat taamatut ataatsimeeqatigiittoqarpoq tibetimiullu aaqqissuisuusut neriuutigaat, nunat namminersornerusut attaveqaqatigiittalernissaannut tamanna aqqutissiuussisinnaajumaartoq.
Nunat namminersornerusut nunarsuarput tamakkerlugu 40-t sinneqarput.
