Vittus: Aningaasanut inatsisissami amigartoorut affaannanngortinneqarpoq
Inissianik tuniniaanermi aningaasat isertinneqartussatut siunniussat, aningaasanut inatsisissamut aappaagumut siunnersuummut, iluaqutaallutik pingaaruteqarluartuusussaasut saqqummiunneqaraluarpoq.
Inissialli tuniniarneqarnissaanut piffissaliussap sivitsorneqarani aningaasanut inatsit ajornartorsiulersussaassasoq aarleqqutigineqartariaqarpoq. Tassami aningaasanut inatsisissatut siunnersuummi siullermi, Nunatta karsia 102 million koruuninik amigartooruteqartussatut siunnersuutaagaluarmat.
Taama amerlatigisunik amigartooruteqassanngitsugut, Aningaasaqarnermut Naalakkersuisoq, Vittus Qujaukitsoq maanna oqarpoq, tassami amigartoorut siunnersuutaasumit maanna affaannanngortinneqarmat.
- Amigartoorutissatut siullertut siunnersuutaasimagaluartumut naleqqiullugu amigartoorutissaq maanna affaannanngortinneqarpoq.
Vittus Qujaukitsoq kalaallisut apersorneqarnissaminut piffissaqanngitsoq taama qallunaatut oqarnera kalaallisuunngortipparput.
Amigartoorutissat taama amerlatigisunik ikilisimaneranni aningaasat suminngaanniit aaneqarsimanersut, Aningaasaqarnermut Naalakkersuisup maanna oqaatigisinnaannginnerarpaa. Sipaarfiusinnaasunilli isertitanillu nutaanit taakku matussuserneqarsimasut, Vittus Qujaukitsup oqaatigaa.
- Aningaasat namminneerlutik takkunnavianngimmata, Naalakkersuisunit kissaatigineqarsimavoq tulleriiaarinikkut isertitsiviusinnaasunillu nutaanik nassaassarsiornikkut aningaasanut inatsisissap siunersuutigineqarnerani amigartoorut affaannagortinneqassasoq.
Aningaasaqarnermut Naalakkersuisup oqaatigaa inissianik tuniniaanermi pilersaarutaagaluartumi isertinneqanngitsoortut ajornartorsiutitut isigineqassanngitsut, oqarluni inissianik tuniniaanissaq suli pilersaarutaammat, 90 million koruunit qaqugu pinerpoq isertinneqarumaartut oqarluni tamannalu pisinnaasoq ukiut sisamat ingerlaneranni.
Inissianik tuniniaanissap ukiut sisamat ingerlanerannut sivitsorneqarnera sunik pissuteqarnersut, Vittus Qujaukitsup ima nassuiaateqarfigaa.
- Inissianik illunillu tuniniaasartut akit qaffanneqarnissaannik ernunanerat tamatumunnga pissutaaqataavoq aamma aningaaseriviit illutaarnermilu aningaasanik atorniartarfiit ernumanerannik tamanna pissuteqarluni.
Inissialli tuniniarneqarnissaannik pilersaarut tamanut saqqummiunneqarmalli aningaaserivinnit tamanna ernumanartutut oqaatigineqarsimavoq, soormita Aningaasaqarnermut Naalakkersuisoq taakku ernumanerannut tusaaniarsimannginnerpa?
- Naqissusertariaqarpara aningaaseriviit illunillu pisiniarnermi atorniartarfiit aningaasanut inatsisissatut siunnersuut ilusilersortussaanngimmassuk, Naalakkersuisulliuku Inatsisartuni partiinut isumaqatigiinniarneratigut suullu pingaarnerutut salliutinneqassanersut aningaasanut inatsisissaq ilusilersorneqartartoq.
Aningaasaqarnermut Naalakkersuisup ilanngullugu oqaatigaa amigartoorutip affaannanngortinneqarneranni suut aqqutit atorneqarsimanersut kingusinnerusukkut oqaatigumaaramiuk.
