Konservative: Vittup oqaaseqarnera naleqqutinngilaq

Nunanut allanut naalakkersuisup Vittus Qujaukitsup taamatut oqaaseqarnera uggoraa.

- Isumaqarpunga Kalaallit Nunaata peqataatinneqarnissaanut Danmarkimi Folketingi danskillu naalakkersuisui sapinngisartik tamaat anguniartaraat. Aamma Kalaallit Nunaata soqutigisai isumaginiarlugit sapinngisarput tamaat sulissutigisarparput. Taamaammat taamatut isornartorsiuisoqarnera, danskit tungaannit eqqunngitsutut isigisatsinnik, uggornarpoq.

Qujaukitsup aviisimi Politikenimi apersorneqarnermini sakkutooqarfiit marluk, Camp Century aamma Pituffimmi sakkutooqarfik immikkut taavai, Danmarkip taakkununnga tunngatillugu Nunatta soqutigisaanik naammaginartumik isumaginnissimannginnerarlugu. Taamatullu isornartorsiusoqarnera Rasmus Jarlovip eqqunngitsuunerarpaa.

- Isumaqarpunga kalaallit politikeriisa amerikamiut sakkutoqaarfeqarnerannut Kalaallit Nunaata akilerneqarnissaanik piumasaqaataat naapertuutinngitsoq. Imaakkami, amerikamiut Kalaallit Nunaata sillimaniarnera qulakkeerniarlugu aningaasartuuterpassuaqarmat.

Qujasariaqartut

Isumaqarporlu Kalaallit Nunaat, Danmark Savalimmiullu USA qujassuteqarfigisariaqaraluaraat.

- Naalaagaaffeqatigiittut tassaavugut amerikamiunut qujassuteqartariaqartut. Amerikamiummi Kalaallit Nunaata sillimaniarneranik qulakkeerinninnera atorluarsinnarlugu kingorna tamatumunnga akiliuteqartoqarnissaanik noqqaaneq eqqumiilaarpoq. Taamatut piumasaqaateqarneq danskit tungaannit tapersersorsinnaanngilarput. Kalaallit Nunaata piumasaqaatai naapertuutinngillat.

Vittus Qujaukitsup apersorneqarnermini, Politikenip saqqaatigut marlunngormat saqqummiunneqartumi oqaatigaa Danmarkip Kalaallit Nunaannut anneruniarnera 'naalagaaffeqatigiinni atassuteqarnitsinnut aserorsaataalluinnartoq'. Taamatullu oqarnermut "ukiuni 75-ini pakatsisimaneq qanoq-iliorsinnaannginnerlu' pissutaasut Qujaukitsup danskit aviisiannut oqaatigaa.

AAMMA ATUARUK Danmarkip anneruniarnera aserorsaataalluinnarpoq

Naleqqutinngilaq!

Konservativeneersup Rasmus Jarlovip kalaallit naalakkersuisuiata oqaaseqarnera Nalagaaffeqatigiinni illuatungeriit  suleqatigiinnerannut iluaqutaasinnaannginnerarpaa.

- Isumaqarpunga oqaatigisai naleqqutinngitsut. Danmarkip Kalaallit Nunaatalu imminnut ungasinnerulerinerannik kinguneqarpoq, tamannalu arlaataluunniit soqutigisarisinnaanngilaa. Danskit naalakkersuisuisa isumaqatigiinniarnerni periaasiat isumaqatiginngikkaanni, taava tamanna uparuarneqartariaqarpoq. Isumaqanngilangali danskit tungaannit Kalaallit Nunaat isiginngitsuusaaripput kalaallillu soqutigisaat soqutiginagit.

Vittus Qujaukitsup oqaatigisai Kalaallit Nunaanni namminiilivinnissaq pillugu oqallinnerup ilagisinnaagaa erseqqissaatigaa.

- Danmarkip uparuartorneratigut Kalaallit Nunaanni nunami namminermi politikkikkut iluareqqusaarnertut ittutut nalilerneqarsinnaalluarpoq. Soorunami tusassallugu nuannerpallaanngilaq. Danmarkip anneruniartutut taaneqarnera iluaqutissartaqarsorinngilara.

AAMMA ATUARUK Danmarkip anneruniarnera aserorsaataalluinnarpoq