Visit Greenlandip misigisassarsiornertalimmik takornariartitsineq qammarusukkaa

Angalalluni misigisassarsiornertalimmik takornariartitsisarneq nunarsuatsinni takornariartaatsit piffissami matumani annertusiartornerpaartarivaat. Taamatullu takornariartartut tassaapput inuit sulinngiffeqarnerminnut atatillugu timiminnik atuiutigalutik tikiffimminni kulturimut pinngortitamullu ataqqinnittartut.

Visit Greenlandillu nunatsinnut taamatut takornariarusussinnaasut amerlanerit suli qammarusukkai, Visit Greenlandip pisortaanera Julia Pars tusagassiuutinut nalunaaruteqarluni allappoq.

Taamaattumik kalaallit aallartitaat aatsaat taama amerlatigisut angalanernik pisisartunik tuniniaasartunillu ussassaarinermi, Adventure Travel World Summit-imi Sverigemi Göteborgimi piffissami matumani ingerlanneqartumi peqataapput.

AAMMA ATUARUK Takornariat amerleriarnerat Visit Greenlandimit nuannaarutigineqartoq

Nunatsinnummi misigisassarsiorniarlutik angalaniartunut suliffeqarfiit 14-it tuniniaasartut inunnik 19-inik aallartitaqartut ussassaarinermi peqataapput.

Visit Greenland aamma Air Greenland ATWS-imik suleqateqarlutik nunatsinnit peqataasunut saqqumititsiniarlutik pisiniartartut, tuniniaasartut aamma tusagassiortut saaffigisinnaasaannik, Greenland Loungemik taasamik, ussassaariffiusumi pilersitsimapput.

Suliffeqarfiit Kalaallit Nunaannik nittarsaassisartut ukuupput; Visit Greenland, Air Greenland, Two Ravens, Arctic Incoming/Hotel Sisimiut, Destination Arctic Circle, Greenland Fjord Tours, Greenland Travel, Sila Greenland, Tasermiut Camp, Colorful Nuuk, Visit South Greenland samt Albatros Travel Greenland aamma Cruise.