Visit Greenland nittarsaanermi angalaqataagami: Kalaallit Nunaat oqaluuserineqaqaaq

Tamanna Visit Greenlandip misigivaa, Naalakkersuisut inuussutissiarsiutinik Tysklandimut Frankrigemullu nittarsaassinermi peqataagami.

Kalaallit Nunaanni suliffeqarfiit Naalakkersuisunut ilaasortaq Jess Svane siuttoralugu, Danmarkimi Tysklandimi sisamanngornermilu Frankrigmi Kalaallit Nunaanni erngup aamma sikup kiisalu takornariaqarneq pillugu nittarsaassimmat.

AAMMA ATUARUK Visit Greenland: Trumpip soqutiginninnera silallu pissusiata sammineqarnera aappaagumut takornariaqarnerutitsissapput

Visit Greenland nittarsaassinermi angalaqataavoq, tassanilu maluginiarneqarpoq, Kalaallit Nunaanni takornarialerinermik suliaqartut tusagassiortunit oqaloqatigineqarusuttorujussuusut, Visit Greenlandip pisortaat Julia Pars taama oqaluttuarpoq.

Europamiut tusagassiorfii soorlu franskit aviisiat Le Figaro aamma Tyskit TVqarfiat ARD Berlinemi aamma Parisi nittarsaassinermi najuupput. 

- Frankrigemi aviisimi  tusaaneqarluartumi Le Figaro-mi aviisiliortut oqaloqatigivagut, aamma Tysklandimi TV-qarfissuarmi ARD-mi tusagassiortut aamma oqaloqatigivagut, Julia Pars oqaluttuarpoq.

Julia Pars isumaqarpoq, silap pissusaata allangoriartornera aammalu amerikamiut præsidentiata Donald Trumpip Kalaallit Nunaata pisiarinissaannik oqarsimanera,  Kalaallit Nunaannut soqutiginninneq annertunerulersoq.

- Silap pissussaata allangoriartornerani Kalaallit Nunaat qitiusumik inissisimavoq,aamma soorunalimi USA-p præsidentiata Trumpip ukiarmi Kalaallit Nunaata pisiarinissaanik oqarnerata kingorna  Kalaallit Nunaata oqaluuserineqarnera annertusisoq malugarput, Julia Pars oqarpoq.

Nunarput soqutigineqarnerulersoq

Takornariat nunanut issittunut angalanissaq soqutiginerulersimavaat, taakkununngalu ilaavoq Kalaallit Nunaat , Visit Greenlandimi pisortaq isumaqarpoq.

-  Takornarianik angalatitsisartunit nunat issitut soqutigineqaleriartuinnartut malugivarput, tassami takornariat nunanut kiattunut angalasartut amerlareermata, maannakkut allamukarusuttalernikuupput, Julia Pars oqarpoq.

Inussutissarsiornermut Takornariaqarnermullu Naalakkersuisup Jess Svanep Kalaallit Nunaani takornarianik sullissisut Kalaallit Nunaat pillugu saqqummiussinerannik nersualaarpai.

AAMMA ATUARUK Takornariat amerleriarnerat Visit Greenlandimit nuannaarutigineqartoq

- Takornarialerinermik ingerlatsisugut isumaqarpunga nersualaagassaasut, taama pikkoritsigalutik, takutitassiassamminnik nassaqareerlutik saqqumiinerat, Jess Svane taama oqarpoq, Julia Parsillu isumaqatigaa.

- Ilaana piareersarluarsimaqaat, saqqumiisut assigiinngitsut aamma Kalaallit Nunaat kusarnartumik nittarsaappaat assigiinngitsutigut, Visit Greenlandimi pisortaq Julia Pars taama oqarpoq.

Kalaallit Nunaanni inuussutissarsiutit europami nittarsaanneqarneranni angalaqatigiit 50-it missaannik amerlatigisut naatsorsuutigaat Nunatsinnut tallimanngornermi uteqqissallutik.