Visit Greenland: Trumpip soqutiginninnera silallu pissusiata sammineqarnera aappaagumut takornariaqarnerutitsissapput
Kalaallit takornariaqarnermut nittartagaat, Visit Greenland naapertorlugu nunatta ukiuni kingullerni ukkatarineqangaatsiarnera siunissami takornariaqarnerulersitsisinnaavoq. Nittartakkami pisortap tulliata, Mads-Daniel Skifte taama naliliivoq.
* 2018-imi timmisartumut ilaasut katillugit 92.677-iupput. Taakku 34 procentii nunatsinni najugaqartutut allassimasuupput.
Tigusiffik: Kalaallit Nunaanni naatsorsueqqissaartarfik
- Taamaattoqarnissaa neriuutigingaatsiarparput aamma naatsorsuutigaarput, pisortap tullia oqarpoq.
Pisortap tulliata USA-p præsidentiata, Donald Trumpip, nunatsinnik aggustimi piserusunnerarnera silallu pissusiata allanngoriartornerata ukkatarineqarnera nunatta tikeraarfigineqarusunnerulerneranut pissutaanerunerarpai.
Nunarput aviisimi innersuussutigineqartut
Nunarput nunat allat 51-it peqatigalugit aviisimi, New York Timesimi 2020-mi nunarsuarmi tamarmi angalaffissatut piukkunnartutut innersuunneqarpoq. Aviisip atuartartutik tikeraapallaqquai.
- Sermersuaq aakkiartupiloorpoq, Kalaallit Nunaannilu marlunnik pilersaarutit malillugit 2023-mi mittarfissuaqalertussaammat Kalaallit Nunaannut takornariaqarfissuanngorpallaannginnerani tikeraarnissat piffissanngorpoq, The New York Times taama kaammattuuteqarpoq.
AAMMA ATUARUK The New York Times: Sermersuup aannginnerani Kalaallit Nunaannukarit
Visit Greenlandip soqutiginnittoqarnera soorunami nuannaarutigaa:
- Amerikap avannaa tuniniaaffitta annerpaat ilagaat, New York Timesikkullu saqqummersinneqarnerput ajunngilluinnarpoq, Mads Daniel-Skifte oqarpoq.
Nittartakkamut isertartut amerleriartut
Nunatsinnulli soqutiginnittoqarnera takornariartoqarnerunissaanik kinguneqarnersoq imaaliaallaannaq paasissallu ajornalaarpoq.
Air Greenland naapertorlugu siorna piffissamut sanilliullugu aggustimit januaarip qeqqanut nunanut allanut angalasoqarnerusimavoq. Angalasulli qassiuneri timmisartuutileqatigiiffiup ilisimatitsissutigerusunngilaa.
Soqutiginnittoqarnerulernerali Visit Greenlandimit malugineqarsinnaalluartoq, Mads-Daniel Skifte naliliivoq.
Visit Greenlandip nittartagaanut isertut Trumpip pisinissamut neqerooruteqarnerata aqaguani amerlingaatsiarput, amerlangaarmata nittartagaq allaat ajutoorluni. Visit Greenlandip tamatuma kingorna isertut 788 procentimik amerlisimasut takusinnaalerpaa.
Isertoqarnerulernera tassanili qaffasiinnavippoq – ikinnerullutilli. Isertut ukiup siulianut sanilliullugit aggustimiit januaarimut 38 procentimik amerlisimapput. Amerliartorneralli pisinissamut neqerooruteqartoqarnerata nalaani amerlilluavipput.
Akunnittarfimmi pisortaq: 2020-mi takornariaqarnerunissaanut sunniuteqarpoq
Ilulissani Hotel Arcticimi pisortaasimasup, takornariaqarnermillu ukiorpassuani malinnaasup, Erik Bjerregaardip oqarnera naapertorlugu Donald Trumpip piserusunnerminik nalunaaruteqarnerani piffissaq tassa aggustip qeqqani takornariaqarnerunissaanut sunniuteqarsinnaavoq. Taassumami oqarnera naapertorlugu piffissaq taanna inuit ukiup tullissaanut angalaffissaminnik pilersaarusiortarfigaat.
- Kalaallit Nunaata USA-mit nunarsuullu ilarujussuanit angalaffissaanissaanera, piserusuttoqarneranik oqallittoqarneranit, immaqa aatsaat eqqarsaataalerpoq. Matumani Kalaallit Nunaannut angalasoqarsinnaanerata soqutigineqalernissaa naatsorsuutigineqarsinnaavoq.
- Taamaammat sunniutaa 2020-mi malugineqarsinnaaleriissasoq ilimagaara, Erik Bjerregaard oqarpoq.