Nunatta Karsiata naatsorsuutai suliffeqarfiup kukkunersiuisartup allap isumagisarilissagai

Nunatta Karsiata naatsorsuutaanik missingersuutaanillu kukkunersiusarfik Deloitte isumaginnittuujunnaarpoq.

Nunatta Karsiata siorna naatsorsuutaanut Inatsisartuni akuersissutigineqarneranut atatillugu, BDO Nunatta Karsiata Naatsorsuutaanik kukkunersiuisussatut nutaatut novembarip arfernganni toqqarneqarpoq.

- Suliassaq Namminersorlutik Oqartussaqalinnginneranili suliffeqarfiup kukkunersiuisartup Deloitte-p isumagisarinikuuaa, kisiannili taakkua 2022-mi suliffeqarfitsik Kalaallit Nunaanniitikkunnaarpaat. Tamatuma kingorna Namminersorlutik Oqartussanut kukkunersiuinermik suliassatik Danmarkimiit suliarisalernikuullugit, Inatsisartut kukkunersiuinermut Ataatsimiititaliaa tusagassiuutinut nalunaarummi allappoq.

- Kukkunersiuinermik suliassap kukkunersiuisoqarfimmit nunatsinni aalajangersimasumik ingerlatsisumit sapinngisamik isumagineqarnissaa Inatsisartut Siulittaasoqarfiata Kukkunersiuinermullu Ataatsimiititaliaata kissaatigisimavaat, taakku allapput.

BDO Nuummi 2013-imiilli allaffeqarpoq. Illoqarfiup qeqqani Deloittep allaffitoqai 2022-mi tiguaat. Nunatta Karsiata Naatsorsuutaanik kukkunersiuisussatut qulequtserluni BDO-p nunatta karsia, kommunit suliffeqarfiillu allat arlallit naatsorsuutaannik isumaginnittunngussaaq.

Kukkunersiuisoqarfiup Inatsisartut aalajangiussaat, nuannaarutigalugulu tanngassimaarutigigaa, tamatumanimi “nunatsinni pisortaqarfinni immikkuullarissumik paasisimasaqarnerulissaagut”, suliassaq nutaaq pillugu BDO-mi kukkunersiuinermut immikkoortortami pisortaq Jakob B. Ditlevsen tusagassiuutinut nalunaarummi taamak oqaaseqaateqarpoq.

- Nunatta Karsiata naatsorsuutaanik kukkunersiuineq, Kalaallit Nunaanni kukkunersiuinermi suliassat annerpaartaralugulu soqutiginarnerpaavoq, taanna oqarpoq.