Villy CIA-mik misissuilersaanngilaq
Folketingip Nunanut allanut tunngasunut ataatsimiititaliaata ataatsimiissutigisai ilaasortanit avammut nalunaarutigeqqusaanngillat. Taamaakkaluartoq ilaasortat marluk, Doris Jakobsen, Siumut aamma Frank Aaen, Enhedslistenimeersoq oqarput, arlaannaannulluunniit attuumassuteqanngitsumik misisuisoqartussaajunnaarnera naammaginanngilluinnartoq.
- Arlaannaannulluunniit attuumassuteqanngitsunik CIA-p timmisartuussisarsimaneragaanerata misissorneqannginnissaa Danmarkimi Naalakkersuisooqatigiit aalajangiussimasaat iluarinagu isornarnerarlugu ataatsimiinnermi oqaatigaara, Siumut sinnerlugu Folketingimut ilaasortaq Doris Jakobsen oqarpoq.
Taassuma taama aalajangiisimaneq aatsaat isornartorsiulinngilaa. Folketingip Nunanut allanut ataatsimiititaliaata ullaaq ataatsimiinnera iluatsillugu, Doris Jakobsen Villy Søvndalimut aammaarluni allakkatigut apeqquteqaqqikkaluarpoq. Taamaattorli Villy Søvndalip akissutaa avammut nalunaarutigisinnaannginnerarpaa. Akissutaali naammagisimaarnagu oqaatigalugu.
Frank Aaen, Enhedslistenimeersoq aamma naammagisimaarinninngilaq:
- Akissutit naammaginngilakka. Nunanut allanut ministerip, Villy Søvndalip misissuisoqannginnissaanik isummersimanini suli attappaa, aammali innersuussutigiinnarlugulu Naalakkersuisut siulittaasuat Kuupik Kleist ataasinngorpat tamannarpiaq pillugu ataatsimeeqatigissagamiuk, Folketingimut ilaasortaq Frank Aaen oqarpoq.
Ataasinngorpat ataatsimiinnissami Naalakkersuisut siulittaasuata, Kuupik Kleistip aammaarluni misissuisoqarnissaa Villy Søvndalimut innersuussutiginiarpaa.
- Kaammattuutigiinnassuara, Nunarput sinnerlugu angusaqarluarniarluni Naalakkersuisut siulittaasuat ilungersorumaartoq aammalu Nunanut allanut ministeri, Villy Søvndal suunngitsunnguamilluunniit ammaassissagaluarpat tamanna Naalakkersusiut siulittaasuata atorluassagaa kaammattuutigissavara, Folketingimut ilaasortaq Doris Jakobsen oqarpoq.
Inuit Ataqatigiit Folketingimi ilaasortaatitaat, Sara Olsvig oqaaseqartissinnaasimanngilarput ataatsimiinnera pissutigalugu.
