Video: Mary uani el-scooterinit aporneqartoq
Dronning Mary kunngikkut Nuummut tikeraarneranni ippassaq aporneqarpoq.
Aappariit illoqarfiit pingaarnersaanni Nuutoqqamut ullaap tungaani qulinut tikeqqammerneranni tamanna pivoq.
Dronning inuppassuit akornanni nikorfatilluni el-scooterimit aporneqariataartoq videomi takuneqarsinnaavoq. Dronningili uppinngilaq, kingunitsianngualu ingerlaqqilluni.
Aporneqarnera Ekstra Bladetimit aamma allaaserineqarpoq. Ekstra Bladetip videoliaani PET-imit nakkutilliisoq ornigulluni dronning scooterilu ungasillisinneqartut takuneqarsinnaavoq. Scooterimik aquttoq aamma ajoqusinngilaq.
Kalaallit Nunaanni Politiit immikkoortortaata kunngikkut tikeraarneranni immikkut suliaqartoqarpoq. Immikkoortortallu aporneq ilisimagaa, taakku paasissutissiipput.
- Susoqarsimanerani misissuleruttorparput, PET aamma aamma misissueqataavoq, Kalaallit Nunaanni Politiit oqarput.
Politiit aportup kinaanera ilisimavaat, piffissamilu matumani annerusumik paasissutisseerusunngillat.
