Dronning Mary scooterinit annikitsumik aporneqartoq
Dronning Mary kunngikkut nunatsinnut tikeraarneranni scooterinit aporneqarpoq, dronningili ajoqusinngilaq.
Ekstra Bladet taama allaaserisaqarpoq, annikitsumillu aportoqarsimasoq kunngikkormiut attaveqaqatigiinnermut immikkoortortaqarfiata aamma uppernarsarpaa.
Ekstra Bladetip ilanngutassiaani videomi Mary scooterinit aporneqartoq uppinngitsorli, kisiannili tupaqqarpasittoq takuneqarsinnaavoq.
PET-imiillu nakkutilliisoq orniguppoq, dronning Marylu scooterilu ungasillisillugit. Scooterimik aquttoq aamma ajoqusinngilaq.
Kalaallit Nunaanni Politiit immikkoortortaata kunngikkut tikeraarneranni immikkut suliaqartoqarpoq. Immikkoortortallu aporneq ilisimagaa, taakku paasissutissiipput.
- Susoqarsimanerani misissuleruttorparput, PET aamma aamma misissueqataavoq, Kalaallit Nunaanni Politiit oqarput.
Politiit aportup kinaanera ilisimavaat, piffissamilu matumani annerusumik paasissutisseerusunngillat.
Kunngikkormiut nunatsinnut kunngip kunnginngornerata kingorna pisortatigoortumik tikeraarnerat arfininngornermi aallartinneqarpoq.
Marylli uia, kunngi Frederik arlaleriarluni nunatsinneereernikuuvoq, ilaatigut kunngissatut Siriuspatrulje 2000-mi peqatigalugu qimussernikuuvoq.
Kunngikkut Nuummi ulluunerani paaqqutarinniffimmut tallimanngornermi pulaassapput. Paaqqutarinniffimmi tassani Mary Fondenip piimmatiginninnermut pinaveersaartitsissutaa malillugu sulisoqartarpoq.
Nunatsinnut tikeraarnerat sapaatip akunneranik sivisussuseqartoq arfininngorpat naammassissaaq.