VIDEO: Siallerujussuarnera paarnanut qanoq sunniuteqarpa?
![](/sites/default/files/styles/image_934x467/public/article_images/det_gode_vejr_avki_still.jpg?itok=n88eJ33V)
Paarnat kigutaarnallu Nuup illoqarfiata ilaannut Qernertunnguit eqqaanut alakkarterpagut. Ullorpassuit sialliinavinnikuulluni, ulluni makkunani silageqimmat sissap eqqaani inuit arfineq marluk silagissiortut, paarnaliartut aalisartullu naapippugut.
Johanne Inuusuttup siorna paarnaqarluarnera eqqaamavaa. Ukioq manna taamarsuaq paarnaqanngitsoq maluginiarpaa. Taannami nuniannani saarullinnik tisarujoorpoq.
Qatanngutigiilli Matilda aamma Oscar paarnanik mamarsalaavissorput.
Aasap annersaani siallernikuunera seqinikisaaraluarluni ninunami naasut ivikkallu iluaqutigiinnaraat, biologip nassuiaatigaa.
Siallerujussuaqattaarneratalu kingorna kiatserujussuarnera paarnaliartartunut nutaarsiassatsialaavoq. Ullunimi makkunani nuniagiarfissaqqippoq.
- Maannakkut silap kiatsinnera paarnanut pitsaasuuvoq, seqinnernera kiannerujussuatalu sukkanerusumik inerisissavai. Taamaattumik ulluni aggersuni paarnaliarnissamut piffissaalluarpoq, tassami paarnat inerissimassapput tungusunnilersimassallutillu.