Video: Akerliussutsimik takutitseqataasoq Inatsisartunut manninnik milloortoq
Aalisartut Inatsisartoqarfiup saani ippassaq akerliussutsimik takutitsisut ilaat inuit akornannit illuartinneqarpoq.
Taannami Inatsisartoqarfiup tungaanut manninnik milloorpoq – politiillu takuaat (aamma KNR-ip assiliiviata.)
Akerliussutsimik takutitsisoq kamattoq tamat torersumiinnerat pillugu nalunaarummik unioqqutitsisimasutut tigusarineqarpoq – akiligassinneqassasorlu Kalaallit Nunaanni Politiit paasissutissiipput.
Aalisarneq pillugu inatsisissaq sivisuumik utaqqineqartoq, Inatsisartut siullermeerlutik ippassaq oqallisigisaat aalisartut akerliussutsimik takutitsissutigaat. Inatsisissatut siunnersuutip oqallisigineqarnera unnukkut nalunaaqutaq qulinut aatsaat naammassivoq, siunnersuullu Inatsisartut piniarnermut aalisarnermullu ataatsimiititaliaanni oqallisigineqaqqissaaq.
Aalisarneq pillugu inatsisissaq Inatsisartut tamarmiullutik maajip arfineq-pingajuanni oqaluusereqqissavaat.
Inatsisissamut tunngasut uani KNR-ip nittartagaani atuarsinnaavatit.