Venedigimut ulluinnarlugu takornariat akiliisinneqartalernissaannik siunnersuut akuerineqartoq
Italiami illoqarfimmut takornarianit ornigarneqarluartartumut Venedigimut ulluinnarlugu takornariartut akiliisinneqartalernissaat Venedigimi illoqarfimmi aqutsisut ippassaq unnukkut aalajangiiffigaat.
Taamatullu misiliineq 2024-mi atuutilissaaq.
Misilillugu aaqqiinermut siunertaavoq, Italiami illoqarfimmut tassaunga takornariarpassuit amerlavallaarujussuarnerisa appaamisinnissaat.
Corona sioqqullugu illoqarfimmut tassunga ullormut takornariat 100.000-t missaat tikittarsimapput.
Taamatut aaqqiineq 2024-mi upernaakkut aallartittumik ulluni 30-ni assigiinngitsuni atorneqassaaq, ullunilu taakkunani nalilersorneqartassaaq ulluni taakkunani takornariat qassit Venedigimukarnissaminnut pilersaarnersut, ullunilu taakkunani ulluinnarlugu takornarianut illoqarfimmut iserneq 5 euromik akeqartinneqarniarpoq tassa koruuninngorlugu 37 koruunimik akeqassalluni.
Billitsilersueriaatsimi tassani apeqqutaassanngilaq meeraq 15-t ataallugit ukioqarnersoq imaluunniit inuit tassani najugaqarnersut sulisuunersut, ilinniartuunersut Venedigimiluunniit inunngorsimanersut. Takornariallu illoqarfimmi tassani unnuiinnarniarunik aamma isernermut akiliuteqassapput.
Siunnersuut akuersissutigineqarpoq, FN-p nunarsuarmi ulorianartorsiornerpaat listiannut Venedig ilanngunneqarnerata kingorna.
Tassalu tamatumunnga Unesco naliliisuuvoq, tassa suliniaqatigiiffiup taassuma nalilerpaa, Venedig takornariaqarfissuartut atuunnera ajornatorsiutaasutut navianaateqartutullu nalilermagu.
