Savalimmiuni Folketingimut qinigaasut unnugu paasinarsissapput
![](/sites/default/files/styles/image_934x467/public/article_images/img_9043.jpg?itok=BFS0tdde)
Folketingimut aqagu marlunngornermi qinersisussaavugut.
Savalimmiunili qinersiviit Savalimmiuni ullaakkut nalunaaqutaq qulingiluanngortoq ammarput.
Savalimmiormiummi Folketingimut ullormik ataatsimik sioqqutsillutik qinersinissamik immikkut ittumik akuerineqarput. Tamaanimi ulloq taanna imaani ajunaarsimasunik eqqaaniaavittut atorneqartarpoq.
Tassa Savalimmiuninngaanniit kikkut Folketingimut qinerneqarsimanersut unnugu paasinarsereersinnaavoq.
Qinersinermimi inernerit Savalimmiuni qinersiviit unnugu matoreerpata kisinneqartussaapput. Qinersisarneq pillugu Savalimmiuni inatsit naapertorlugu taamaappoq, inernerillu Danmarkimi nunamut namminermut ministereqarfimmit uppernarsarneqartussallutik. Nutaarsiassaqartitsivik Ritzau taama allappoq.
AAMMA ATUARUK Kalaallit Nunaat Savalimmiullu Folketingimut qinersereernermi aalajangiisooqataanerorusuttut
Folketingimut kingullermik 2019-imi qinersisoqarmat, Savalimmiuni inernerit nunatta nalunaaqutaa naapertorlugu unnukkut nalunaaqutaq qulingiluanut qiteqqunnerata qulingilualluunniit missaanni saqqummiunneqarput, ukioq mannalu aamma taamaassangatinneqarluni.
Savalimmiuni partiit Folketingimut maanna ilaasortaatitaqartut Sambandsflokkurin Javnaðarflokkurinilu ilaasortaatitaqaqqilernissaat ilimanarsinnaasoq, isumasiuinerit kingulliit takutippaat.
Sambandsflokkurinip Jakob Ellemann-Jensen ministeriunertut piukkuppaat, Javnaðarflokkurinilu Mette Frederiksen tunngaviusumik tapersersorlugu.