Savalimmiormiut ulloq qinersivissaq oktobarip 31-anut nuutsikkaat

Savalimmiormiut folketingimut qinersinissamik ullormut allamut nuutsitsinissamut akuerineqarput. Folketingimi partiit amerlanerussuteqartut tamanna akueraat.

Tamanna nunamut imminermut ineqarnermullu ministerip, Christian Rabjerg Masenip Ritzau-imut uppernarsarpaa.

- Savalimmiuni novembarip aallaqqaataani folketingimut qinersisoqarani oktobarip 31-anni qinersisinnaanissaat pillugu inaarutaasumik aalajangiisoqarpoq.

Savalimmiormiut Naalagaaffeqatigiit sinnerinit ullormit ataatsimik siulliullutik oktobarip 31-anni qinersisinnaanissaannik ministeriunermut Mette Frederiksenimut (S) noqqaassuteqartoqarpoq.

Folketingimi partiit qinnuteqaammik oqaluuserinninnissaq pissutigalugu arfininngornermi aggersarneqarput.

Ulloq imaani ajunaarsimasunut eqqaaniaaviusoq

Savalimmiuni lagmandip, Bárdur Steig Nielsenip oqarnera naapertorlugu folketingimut qinersinissap novembarip aallaqqaataani pinissaa iluarineqanngilluinnarsimavoq. Tamanna ministeriunerup allappaa.

Savalimmiunimi ulloq taanna imaani ajunaarsimasunik eqqaaniaavittut atorneqartarpoq.

AAMMA ATUARUK Savalimmiormiut ullumi allami qinersisinnaanissamik piumasaqarnissamik isumaliuteqartut

Ministeriunerup Mette Frederiksenip (S) ullup aliasuffiup folketingimut novembarip aallaqqaataani qinersinissamut aporfiusinnaanera ilisimasimanngilaa.

- Ministeriunertut qinersinissamik suaarutiginnikkaanni taava apeqqut una apeqqutigineqartuaannarpoq: ”Qinersinerup ullormi uani ingerlanneqarnissaanut arlaannik aporfissaqarpa?” Aporfissaqarsinnaaneranillu ilisimatinneqanngilanga.

Savalimmiuni folketingimut qinersinerup ullormi allami aaqqissuunneqarnissaanut siornatigut aamma akuersisoqareernikuuvoq.

Qinerneqartut ulloq ataaseq sioqqullugu saqqummersinneqassasut

Christian Rabjerg Madsenip Savalimmiuni taaguunneqartut oktobarip 31-anni – tassa Danmarkimi qinersinissamut ulloq ataaseq sioqqullugu saqqummersinneqarnissaat naatsorsuutigaa.

- Qinersinerup kinguninnguani kisitsisoqarnissaa inernerisalu saqqummersinneqarnissaat Savaliommiuni qinersinermi inatsisaavoq. Taamaammat taama pisoqarnissaa naatsorsuutigaara, taanna oqarpoq.

Ministeriup tamatuma qinersinerup sinneranut sunniisinnaanissaa ernumassutiginngilaa.