Savalimmiormiut ullumi allami qinersisinnaanissamik piumasaqarnissamik isumaliuteqartut
Savalimmiuni Rigsombudsmandip savalimmiormiut ullormi allami novembarip allaqqaatiginngisaani folketingimut qinersisinnaanissaat qinnutiginiarlugu isumaliutigigaa, savalimmiormiut tusagassiorfiat, KVF allappoq.
Novembarip allaqqaataata imaani ajunaarsimasunik Savalimmiuni eqqaaniaaffittut atorneqartarnera tamatumani pissutaavoq.
Rigsombudsmandip ullormi allami qinersisoqarsinnaaneranik apeqquteqarnissani isumaliutigigaa, Savalimmiormiut Folketingimut ilaasortaatitaata aappaata, Sjúrður Skaalep Ritzau-imut oqaatigaa.
Tassungali tunngatillugu allamik ilisimasaqarani ilanngullugu oqaatigaa.
Venstrep gruppiani siulittaasup, Thomas Danielsenip affarmik savalimmiormiuusup Savalimmiuni ulloq qinersiffik ullumut allamut nuutsinneqartariaqarsoraa.
- Ulloq immikkuullarilluinnartuuvoq, tassa imarsiortut annaasimasat eqqaaniarneqartarput nigaliliartaliisoqartarlunilu, aamma amerlasuut ulloq taanna sulineq ajorput, imaluunniit ullup affaannaani sulisarlutik.
AAMMA ATUARUK Folketingimut novembarip aallaqqaataani qinersissaagut
Taamaammat Venstrep Savalimmiuni ullup qinersiffissap nuutsinneqarnissaanik ministeriuneq, Mette Frederiksen (S) dronningimut innersuussuteqassasoq kaammattuutigaa.
Naalagaaffeqatigiinni qinersinermi assersuutigalugu Savalimmiuni ullumi allamik qinersisoqarnissaanut ulluliinissaq periarfissaavoq.
Savalimmiuni lagmandiusimasup, Kaj Leo Holm Johannesenip ulloq novembarip aallaqqaataat ulloq qinersiviunani eqqaaniaaffiusartoq, Facebookikkut allappaa.
Savalimmiuni biskoppip, Jógvan Fríðrikssonip ulloq novembarip aallaqqaataat eqqaaniaaffiugaluartoq qinersisoqarnissaa ajornartuusorinagu, savalimmiuni tusagassiorfimmut Sosialurinimut oqarpoq.
Danmarkimi Folketingimut qinersisoqarneranit piffissami allami Savalimmiuni arlaleriarluni qinersisoqarnikuuvoq.
Ritzau-ip ullumik allannguinissamik isumaliuteqarneq Rigsombudsmandimit sulissutiginiarneqarnersoq oqaaseqarfigineqartinniaraluarpaa, iluatsinngitsumilli.
/ritzau/