Folketingimut novembarip aallaqqaataani qinersissaagut

Kalaallit, savalimmiormiut danskillu qineqqusaartuni partiiniluunniit qinigassanngortitsisuni Folketingimi qinigaaffimmi tullermi ilaasortanngortikkusutaminnik novembarip aallaqqaataani qinersissapput.

Ministeriuneq Mette Frederiksen (S) tusagassiortunik katersortitsinermi aatsaarluinnaq naammassisumi taama nalunaarpoq. Dronning Magrethe ulloq taanna siusinnerusukkut ataatsimeeqatigereerlugu taamaaliorpoq.

Folketingimut qineqqusaarneq sapaatit akunnerinik sisamanik sivisussuseqartussaq nunatsinni taamaalilluni aamma aallartippoq.

Folketingimut qineqqusaartuni nunatsinneersut tallimaagallarput, ukuuppullu: Kiista Fencker aamma Juno Berthelsen Naleqqameersut taavalu Folketingimi 2015-imili ilaasortaq Aaja Chemnitz Inuit Ataqatigiinneersoq.

Atassummeersullu Aviaq Kleist taavalu Arnánguak Jeremiassen aamma qinigassanngortipput.

Siumut Demokraatillu ullumi nalunaaruteqassasut

Siumup Demokraatillu qinigassanngortitatik ullumi nalunaarutigissavaat.

Qinigassanngortinnissamut malittarisassat naapertorlugit qinersinissamut ullut aqqaniliinnanngortinnagit qinigassanngortittoqarsinnaavoq.

Socialdemokratit kisermaajullutik maanna qinigaaffimmi naalakkersuisuupput. Mette Frederiksenili siammasissunik naalakkersuisoqatigeeqalernissaa, tassa partiinik arlalinnik naapeqatigiinnikkut suleqatigiittoqarnissaa siunertaralugu qinersisitsinissamik nalunaaruteqaqqammerpoq. 

AAMMA ATUARUK Politikerertavut Folketingimut qinersinermi aalajangiisuusinnaasut

- Danmarkimi naalakkersuinikkut nutaamik aaqqissuussinissarput piffissanngorpoq, ministeriuneq Mette Frederiksen tusagassiortunik Marienborgimi katersortitsinermi oqarpoq.

- Piffissami kingullermi imaannaanngitsunik pisoqarpoq. Europami sorsuttoqarlunilu tamaani aningaasaqarneq nalorninartoqarpoq. Ulluinnarni pisariaqartitavut tamarmik akitsoraluttuinnarput. Isumannaallisaanerput aamma ajornartoorfiuvoq, taamaammallu folketingimut qinersisitsinissamik maanna nalunaaruteqarnera immikkuullarippoq. Taamaaliussasungali Folketingimi amerlanerussuteqartut kissaatigaat.

Radikalikkut qinersisitsinissamik nalunaaruteqaqqusisuusut

Danskit maanna naalakkersuisuinut ikorfartuisut, Radikale Venstrekkut, Mette Frederiksenip qinersisitsinissamik nalunaaruteqarnissaanik piumasaqartuupput.

Danmarkimimi minkeqarfiit tamaasa coronavirusip tuniluutileruttornerani matuneqarnerisa misissuiffigineqarnerisa inernerat Radikale Venstrekkut assuaraat.

Mette Frederiksenimmi, danskit naalakkersuisui atorfilittallu minkit tamarmik toqorarneqarnissaannik naalakkiisimanerat suliamik misissuisunit isornartorsiorneqangaatsiarpoq. Taamaammat Radikale Venstrekkut Mette Frederiksen qinersisitsinissamik nalunaaruteqassasoq aasaq piumasaraat. Folketingimi ataatsimiilernermi taamaaliunngippat tatiginnikkunnaarnermik nalunaaruteqarnikkut uppisinniarlugu aamma nalunaarput.