Uusaqqak Qujaukitsoq toqukkut qimaguppoq
Uusaqqak Qujaukitsoq, Inatsisartuni ilaasortaasimasoq aamma Avanersuarmiut Uummannamit Qaanaamut pinngitsaalisaallutik nuutsitaaneranni soqutigisaannik pisinnaatitaaffiinillu sorsuutiginnissimasoq, sisamanngornermi ullaap tungaani toqukkut qimaguppoq. Uusaqqak Qujaukitsoq 70-inik ukioqalerpoq.
Allattoq Jens Thorin
aggustip 02-at 2018 12:47
Politikeriusimasoq Uusaqqak Qujaukitsoq sivikitsumik napparsimareerluni toqukkut qimaguppoq.
Tamanna ilaqutaasut KNR-imut uppernarsarpaat.
Uusaqqak Qujaukitsoq Inatsisartut nersornaasiuttagaannik sølviusumik 2016-imi nersornaaserneqarpoq inuiaqatigiinni kikkunnut tamanut atugassarititaasut pitsanngorsarniarlugit ilungersorluni suliniuteqartarsimanini pillugu.
AAMMA ATUARUK Kunngissap inuuissiornera eqqaamasanik qaffakaatitsivoq
Uusaqqak Qujaukitsup suliniarnera ukiorpassuarni maluginiarneqartarsimavoq, naalakkersuinikkut sulinermi
malunnaateqarsimalluni ukiullu ingerlanerini kommunalbestyrelsimut, siullermik 1971-imi, Inatsisartunullu, siullermik 1984-imi, ilaasortaasarsimalluni.
